Министерот за здравство Никола Тодоров денеска ги повика докторите кои од различни причини учествуваат во штрајкот да се потсетат на Хипократовата заклетва.

- Група доктори престана да ги оперира пациентите кои се болни од рак. Како резултат на ова се преоптоварија докторите кои совесно ја вршат нивната дејност и почнуваат да се креираат листи на чекање за операција на пациенти болни од рак. Ова е целосно спротивно на Хипократовата заклетва, спротивно на етиката, на хуманоста и човечноста, рече Тодоров.

Изминатиот период, посочи тој, сведоци сме на едно креирано незадоволство на здравствените работници со цел постигнување на посакувана политичка цел.

Овој пат, нагласи тој, болната политичка извитопереност на креаторите на манипулацијата била мотивирана од потребата да се покаже масовност на штрајкот што утре планираат да го финансираат и организираат пред Владата.

- Реформите го движат системот напред. Токму тоа претставува системот за плаќање по успешност. СДСМ не направи ваква реформа. За мене е јасно зошто не направиле. Реформите се по дефиниција болни, ги загрозуваат дотогашните односи, функционирање, комодитет, со цел да постават нови кои ќе бидат поефикасни, понапредни. Видоа дека не им проаѓа така лесно сценариото со лажење и манипулација да креираат незадоволство, немаат масовност и не можат да ја реализираат замислата на партискиот шеф да извадат на улица стотици доктори, посочи Тодоров.

Тој потенцира дека системот за плаќање по успешност е реформа која треба да овозможи поставување целосно десубјективизиран систем на награди и казни, систем кој силно ќе ги стимулира работниците, но исто така и силно ќе го дестимулира неизвршувањето на работните обврски.

Тоа е, како што рече, систем кој не дозволува докторот чија врата се заклучува во 12 часот да добие иста плата со докторот кој е целосно посветен на своите пациенти и чија врата е отворена постојано за пациентите.

- Проектот плаќање по успешност треба да ги наградува тие што се коректни и професионални кон пациентите, а да ги казнува тие што не се. Ако ме прашате дали сметам дека овој систем е совршен или идеален одговорот е не. Тоа е така зашто не постои идеален здравствен систем, бидејќи здравството е предмет на постојана дебата во секоја земја, истакна Тодоров.

Според него, штрајкот на лекарите бил подготвуван и организиран со постојано повторување невистини за моделот, во правец на тоа дека докторите ќе земаат 80 отсто од платата.

По 5 месеци од примена на моделот, како што укажа, факт е дека само 6 отсто од вкупниот број доктори земале 80 отсто од платата при што најголем дел од нив се доктори кои од политички побуди или од каприц воопшто не внесуваа податоци во системот, а истовремено, 445 лекари месечно се наградени и бројот на наградени од месец во месец постојано расте, посочи Тодоров.

- Никогаш не сум помислил да предложам или спроведам мерка за намалување на платите на медицинските сестри ниту за 30 отсто ниту за 1 отсто, ниту за какво било намалување на нивните плати. Тврдам јавно и одговорно дека ова е само уште една од лагите за да се креира оваа политичка манипулација за која денеска зборувам.  Иста режија, исто сценарио, исти извршители, само лагата се менува. И сето тоа со цел и таргетирано, рече Тодоров.

Тој додаде дека ќе инсистира на имплементација на оваа реформа, не од инает, каприц или суета, туку поради тоа што е убеден во исправноста на принципот на оваа реформа.