Arben Fetai është një profesionist me përvojë në fushën e politikave publike dhe integrimeve evropiane, me një karrierë të pasur ndërkombëtare. Ai ka lindur më 11 dhjetor të vitit 1980 në Kumanovë dhe posedon dy shtetësi: atë të Maqedonisë së Veriut dhe të Belgjikës.

Fetai filloi arsimin e lartë në Belgjikë, ku studioi shkencat politike në Universitetin në Liezh nga viti 1999 deri në vitin 2001. Më pas vazhdoi në Universitetin e Lirë të Brukselit, ku u diplomua në shkencat politike dhe marrëdhëniet ndërkombëtare (2001-2003). Nga viti 2003 deri në vitin 2006, Arbeni u specializua në fushën e studimeve evropiane në Institutin për Studime Evropiane në Belgjikë.

Karriera e tij profesionale filloi në vitin 2004, kur punoi si ekspert i ri në një projekt të financuar nga BE-ja për të mbështetur Kuvendin e Kosovës. Më pas, nga viti 2006 deri në vitin 2008, ai ishte zyrtar për lidhje të projektit për ngritjen e kapaciteteve për integrime evropiane në zyrën e Kryeministrit të Kosovës. Nga viti 2010 deri në vitin 2018, përsëri, punoi si këshilltar i lartë për politikat e BE-së në projektet e financuara nga Fondacioni Bill dhe Melinda Gejts.

Në vitet e fundit, Fetai ka punuar si koordinator për avokim global në Aidsfonds në Bruksel dhe si drejtor ekzekutiv të Institutit për Politika Publike Arben Xhaferi në Shkup. 

Përveç gjuhës shqipe, flet maqedonisht, frengjisht, anglisht dhe holandisht.