“Optimizmi im dhe ai i Kryeministrit Petkov janë për shkak të progresit në punën e grupeve të punës të formuara nga Qeveritë e Maqedonisë së Veriut dhe Bullgarisë. Përkundër komunikimit minimal mes dy vendeve fqinje dhe me një hapësirë ​​mediatike të dominuar nga propagandistët, tani kemi rezultate të dukshme”, tha Kryeministri Dimitar Kovaçevski në emisionin “360” në TV Alsat-M.

“Tashmë kemi fluturimin direkt që është diskutuar në takimin e parë. Tashmë kemi bursat e para të dhëna për studentët tanë në Bullgari dhe të njëjtën gjë do ta bëjmë edhe në Maqedoninë e Veriut. Ne kemi nënshkruar edhe disa marrëveshje dhe memorandume të tjera për bashkëpunim në transport, në kulturë... Nga kjo shprehemi të kënaqur, Kryeministri i Bullgarisë dhe unë”, tha Kryeministri Kovaçevski.

Lidhur me kritikat nga opozita, Kryeministri Kovaçevski tha se është dëshmuar se gjuha, identiteti dhe veçantia e popullit maqedonas nuk janë temë e bisedimeve dhe se opozita ka praktikë të rregullt të kritikojë të gjitha marrëveshjet që bëjnë një hap strategjik përpara për vendin tonë.