“Qytetarët duhet ta dinë se Qeveria po punon që të sigurojë energji elektrike në sasi të mjaftueshme me çmim që nuk do të shkaktojë rritje të mëdha në çmime, të merren masa me kohë dhe të informohet opinioni në mënyrë transparente për gjendjen energjetike në vend”, theksoi Kryetari i Qeverisë së Republikës së Maqedonisë së Veriut Dimitar Kovaçevski në emisionin “Bisedë në redaksi” të laboratorit hulumtues IRL.
“Ne e kemi bërë këtë që nga dita e parë deri më sot. Përsa i përket nëse duhet të komunikojmë më shumë, po, jemi dakord, duhet. Çdo qytetar duhet ta dijë se fatura që marrin mbi 600.000 amvisëri dhe 72.000 kompani në tregun e rregulluar, pra konsumatorë të vegjël, e marrin çmimin e subvencionuar nga Qeveria, nga Buxheti. Një buxhet që është qytetar, që mbushet nga taksat e qytetarëve dhe nëse nuk do të ishte ai subvencionim, qytetarët, amvisëritë do të paguanin pesë herë më shumë faturën e energjisë elektrike nga ajo që paguajnë sot. Siguruam energji termike për qytetin e Shkupit, për 60.000 amvisëri. Është detyrim i shtetit që të sigurojë një çmim që qytetarët mund ta përballojnë dhe një çmim që do të mund ta paguajnë”, tha Kryeministri Kovaçevski.
Gjatë vizitës, Kryeministri Kovaçevski theksoi se 5% e buxhetit është ndarë për masa antikrizë, pako kjo që është më e madhja në rajon, siç konfirmohet nga Banka Botërore. Të gjitha masat janë projektuar në bazë të opinioneve të ekspertëve, analizave të gjera dhe vendimeve të marra nga Qeveria.
“Kjo nuk është një kohë e bollëkut, kjo është një kohë e kursimeve dhe solidaritetit. Shteti duhet të jetë ai që nuk do të financojë bollëkun, por do të financojë kategoritë më të cenueshme të qytetarëve. Pra, pensionistët me pensionin më të ulët prej 11.525 denarë, pensionistët deri në 14.000 denarë do të marrin ndihmë shtesë financiare në katër muajt e ardhshëm. Bëhet fjalë për 130.000 pensionistë, 41.000 bashkëqytetarë tanë nga kategoritë më të cenueshme, ku do të marrin mbështetje financiare edhe kategori të ndryshme qytetarësh nga prindërit e vetëm deri te punëtorët e falimentuar e të tjerë. 4.000 familjet më të varfra marrin shtesë financiare për dru zjarri ose energji elektrike në varësi të asaj që përdorin për ngrohje. Të gjitha në mënyrë që të sigurohen më të cenuarit gjatë këtij dimri më të vështirë që na pret”, tha Kryeministri Kovaçevski.
