"Ne mbetemi fuqishëm të përkushtuar në korridorin hekurudhor 8. Për momentin punohet aktivisht në aksin e dytë me gjatësi prej 34 kilometra, që shtrihet nga Beljakovca deri në Kriva Pallankë. Në muajin janar e vumë në përdorim aksin e parë nga Kumanova deri në Beljakovcë dhe mbetemi të përkushtuar në dialogun me Bullgarinë me qëllim të gjejmë një zgjidhje të përbashkët të pranueshme teknike lidhur me tunelin që duhet të lidhë të dyja shtetet dhe ndërtimin e aksit të tretë, sepse besojmë se Korridori 8 është jashtëzakonisht i rëndësishëm, jo vetëm për Maqedoninë, por për gjithë rajonin dhe për mbarë Evropën. Ky është një korridor i NATO-s, ai është korridori i dytë më i rëndësishëm për NATO-n dhe përkushtimi ynë mbetet i palëkundur.

Me keqardhje e pranojmë informacionin që arriti dje, i cili është një dokument zyrtar i miratuar nga qeveria bullgare, me të cilin Bullgaria vendosi të heqë mjetet që më parë ishin paraparë për rindërtimin e pjesës nga Sofja deri në Gjueshevë, duke pasur parasysh se ekziston një linjë hekurudhore, por ajo është në gjendje të mjerueshme dhe nuk mund të përdoret, nuk është e mjaftueshme vetëm ndërtimi i tunelit dhe lidhja me Gjueshevën, por shumë më e rëndësishme është të bëhet rikonstruksioni nga Gjuesheva deri në Sofje, me qëllim që Shkupi dhe Sofja të lidhen.

Duke pasur parasysh se ata miratuan vendimin që mjetet për ndërtimin e hekurudhës nga Sofja në Pernik dhe deri në Radomir t’i ridestinojnë për ndërtimin e linjës nga Sofja deri në Burgas, mendoj se ata qartë po dërgojnë një mesazh politik lidhur me përkushtimin e tyre apo më saktë, mospërkushtimin e tyre për ndërtimin e korridorit hekurudhor 8 dhe gjithashtu, bie poshtë e gjithë propaganda që është zhvilluar gjatë shtatë muajve të fundit kundër Kryetarit të Qeverisë, kryesisht kundër kryeministrit Mickoski dhe kundër meje, duke pretenduar se kemi diçka kundër Bullgarisë, se nuk duam të lidhemi, se kemi një bosht Athinë-Beograd dhe marrëzi të ngjashme që ishin pjesë e propagandës. Por në fund, e vërteta doli në shesh dhe ajo është se gjithçka ka qenë një mashtrim, si për opinionin ashtu edhe për institucionet evropiane, ndërsa qëllimet e vërteta kanë qenë krejtësisht të ndryshme.

Unë dua t’ju informoj se këtë mëngjes kam dërguar letra në Delegacionin Evropian, në Komunitetin Evropian të Transportit, por poashtu edhe në dy bankat, BEI dhe BERZH, duke pasur parasysh se Maqedonia ka nënshkruar marrëveshje për kredi për Korridorin 8 në vlerë prej 350 milionë euro dhe nëse të njëjtat nuk përdoren, do të duhet të paguajmë tarifa rezervimi dhe në këtë rast, ato nuk do të përdoren jo për fajin tonë, por për fajin e shtetit fqinj dhe duhet të mbrojmë edhe interesin financiar të shtetit.

Ne shpresojmë që dialogu do të vazhdojë, përpjekjen e fundit e bëmë më 7 mars, kur unë dërgova një letër përmes MPJ-së drejtuar qeverisë bullgare, në Ministrinë bullgare për Transport dhe tek të gjithë përgjegjësit. Nga ana jonë, është formuar grup pune në nivelin më të lartë të mundshëm, ku përveç meje janë edhe ministri i Punëve dhe Tregtisë së Jashtme, ministrja e Financave dhe drejtori i Hekurudhave të Infrastrukturës. Presim të njëjtin përkushtim edhe nga ana e Republikës së Bullgarisë, me qëllim që të mund ta ndërtojmë dhe ta lidhim Sofjen dhe Shkupin dhe në fund vendimi të jetë i përbashkët. Por, qeveritë ndryshojnë, ndërsa përkushtimi mbetet, unë shpresoj që me këtë ose me qeverinë e ardhshme bullgare do të arrijmë ta ndërtojmë Korridorin 8, sepse ai është një arterie kyçe jo vetëm për Maqedoninë, por për gjithë rajonin,” – deklaroi zëvendëskryeministri Nikolloski.