Kryetari i Qeverisë së Republikës së Maqedonisë së Veriut, Hristijan Mickoski, në Samitin e sotëm 2025, i organizuar nga “Maqedonia 2025”, theksoi se që në ditën e parë të marrjes së detyrës është përballur me shumë sfida, por siç tha, kemi rezultate për një jetë më të mirë për qytetarët.
"Pak më shumë se 10 muaj nga formimi i qeverisë së re, afërsisht një vit pas përfundimit të zgjedhjeve, një periudhë që do ta quaja e mbushur me sfida, periudhë në të cilën të gjithë së bashku mësuam gjëra që për herë të parë na ndodhën, jo vetëm neve, por edhe qytetarëve në përgjithësi. Periudhë në të cilën, nëse duhet të jap një përgjigje të saktë nëse ajo që gjetëm ditën e parë të punës ishte sipas pritshmërive tona, atëherë do të thosha se kemi qenë optimistë. Por, nuk do të doja që gjithçka të kthehet tani në thashetheme për atë që ka qenë më parë. Thjesht sfidat ishin të mëdha, llogaria e qeverisë ishte negative, madje do të thoja që në vitin 2002 pas konfliktit ajo ishte pozitive, kësaj here ndodhi të jetë negative. Nëse këtë e tregojmë me shifra, diku rreth 12 miliardë denarë, apo 200 milionë euro dhe çdo ditë kishim surpriza të reja të pakëndshme, për hir të së vërtetës ende kemi. Por, ky është problemi ynë. Unë jam i vetëdijshëm se njerëzit kanë pritshmëri që tani dhe menjëherë të ndodhin shumë gjëra dhe kjo është e natyrshme. Më shumë se 3 dekada premtime të tepërta, por shumë pak realizim. Ne duhet të punojmë sepse rezultatet tashmë po vijnë."
Në pyetjen se çfarë ka qenë më e vështira me të cilën është përballur që nga fillimi i mandatit, Mickoski theksoi se kjo ka qenë fatkeqësia në Koçan, për të cilën siç tha, ka qenë dita më e vështirë në jetën e tij.
"Në aspektin politik, ishte ajo ngjarje e tmerrshme që ndodhi në Koçan. Dita më e vështirë e jetës sime. Më kujtohet ai mëngjes rreth orës tre e gjysmë, kur një person trokiti në derën e shtëpisë sime, ishte një person nga sigurimi i ministrit të Punëve të Brendshme sepse nuk po përgjigjesha në telefon. Menjëherë mora telefonin dhe gjëja e parë që bëra ishte të thërras njerëzit e ekipit tim për të shkuar në Koçan, arritëm rreth orës 5 të mëngjesit. Atje ishte tashmë ministri i Punëve të Brendshme, më pas shkuam edhe në stacionin policor. Më kujtohet që në gjithë atë situatë, është e logjikshme si njeri të reagosh dhe të kesh emocione të forta, por duhet të merren vendime. Ndihma vinte nga të gjitha anët, veçanërisht nga rajoni, ndërsa e dini se për fat të keq nuk kemi marrëdhënie të shkëlqyera me fqinjët, do të thosha me njërin nga fqinjët dhe kur duhet të marrësh një vendim, duhet të mendosh për të gjitha pasojat që mund të ndodhin. Nga ana tjetër, disa nga mjekët thonin se pacientët në atë gjendje të rëndë nuk janë për transport. Kur pyeta, mirë, cili është opsioni ynë, më thanë se opsioni është që ne t’i trajtojmë ata dhe me shumë mundësi do të kemi edhe viktima të tjera që nga sot, sepse 72 orët e para janë më kritiket", tha kryeministri Mickoski.
Mickoski theksoi se mbi 200 pacientë janë transferuar në qendra të tjera kujdesi, duke nënvizuar se Qeveria do të vazhdojë me ndihmën dhe mbështetjen për familjet dhe falënderoi të gjithë ata që u përfshinë në ndihmë.
Sa i përket politikave ekonomike, Mickoski theksoi se në thelb ishte e nevojshme stabilizimi i shtetit në këtë vit të parë, sepse shteti ishte në rënie të lirë.
"Në thelb, na duhej stabilizimi i shtetit në këtë vit të parë, sepse shteti ishte në rënie të lirë. Kur dikush thotë se institucionet nuk funksionojnë, unë do të thosha se nuk kishim institucione. Dhe kur ndodheni në një situatë të tillë, gjëja e parë që duhet të bëni është të ndaloni atë rënie të lirë. Nuk mund të jeni tepër ambicioz, është jologjike dhe joreale nëse përballeni me probleme themelore ekzistenciale. Ne kemi probleme themelore ekzistenciale që janë rezultat i politikave dhe sjelljeve shumëdekadëshe. Prandaj strategjia jonë ishte të ndalojmë rënien e lirë, pastaj të përpiqemi të arrijmë një gjendje zero dhe më pas të fillojmë të mendojmë për reforma më thelbësore që mund të shtojnë vlerë. Dhe unë mendoj se nga ajo që kemi parashikuar, kemi arritur në një gjendje zero ose po arrijmë në atë gjendje, edhe pse menduam se do të na duheshin ndoshta më shumë se një vit e gjysmë deri në dy, vlerësoj se këto performanca dhe parametra që shfaqen si indikatorë tashmë tregojnë se po arrijmë në një gjendje zero, në mënyrë që më pas të zhvillojmë të gjithë parametrat që planifikojmë t’i zhvillojmë. Inputi kryesor ishte të shohim cili është avantazhi ynë strategjik krahasuar me vendet përreth, por edhe në përgjithësi cili është avantazhi strategjik i Maqedonisë si shtet në krahasim me shtetet e tjera evropiane.
Dua të them se ekonomia jonë ka një potencial të madh dhe jam i bindur se edhe në këtë moment jemi me performanca shumë përpara të tjerëve. Do t’ju kujtoj se Banka Botërore parashikonte për vitin 2024 se do të kishim rritje të BPV-së prej 1,8 për qind. Duhet të them se ishin pesimistë, ndoshta duhej t’i jepnin vetes më shumë optimizëm. Ne kishim 2,8 për qind, që nuk është e mjaftueshme, por është mjaftueshme sepse në tremujorin e tretë dhe të katërt kemi një normë rritjeje mbi 3 për qind dhe për tremujorin e parë të këtij viti, duke pasur parasysh indikatorët fillestarë, prodhimin industrial, turizmin dhe të tjera, nuk do të befasohesha nëse kemi rreth 3,5 deri në 4 për qind, që do të përfaqësonte një nga rritjet më të larta të BPV-së në Evropë", është decid Mickoski.
