Ministri i Shëndetësisë, dr. Ilir Demiri dhe drejtori i përgjithshëm i Diaverum, Dimitar Klisarovski, sot ata informuan se është siguruar skriningu falas për 2000 pacientë të rrezikuar nga sëmundje kronike të veshkave.

“Si pjesë e konkluzioneve të Akademisë së Parë Renal të mbajtur nëntorin e kaluar me iniciativën e Ministrisë sonë dhe Ambasadës Suedeze, me synim ndërgjegjësimin për sëmundjet e veshkave dhe parandalimin e hershëm të saj, së bashku me ofruesit e dializës Diaverum dhe Nephroplus, njoftojmë nisjen e projektit “Skrining i popullatës në rrezik nga sëmundjet kronike të veshkave”. Skriningu nis këtë muaj, do të zgjasë katër muaj dhe do të mbulojë gjithsej 2000 pacientë të rrezikuar në të gjithë vendin. Kompetencat dhe burimet e përbashkëta nga fusha e shëndetit të veshkave do të jenë në dispozicion për mbulimin sa më të gjerë, parandalimin dhe kujdesin më të aksesueshëm të popullatës, që në fakt është pjesë e motos vjetore të Ditës Botërore të Veshkave”, tha Demiri.

Klisarovski theksoi se realizimi financiar i projektit është tërësisht përgjegjësi e objekteve shëndetësore Diaverum dhe Nephroplus, që do të thotë se ekzaminimet për pacientët do të jenë falas.

“Ideja për të filluar një projekt të tillë depistimi ka ekzistuar edhe më parë, duke parë gjendjen e pacientëve që nisin dializën, në të cilën në shumë raste pacientët nuk ishin as të vetëdijshëm se kishin sëmundje kronike të veshkave deri në momentin e fillimit të dializës, që është Faza e fundit e sëmundjes kronike të veshkave. Ministria e Shëndetësisë, Administrata Elektronike e Shëndetësisë, ne – Diaverum dhe kolegët tanë nga Nephroplus kemi investuar maksimalisht që ky projekt për skrining falas të popullatës në rrezik nga sëmundjet e veshkave të jetë në dispozicion të pacientëve”, tha Klisarovski.

Qytetarët që janë në rrezik të zhvillimit të sëmundjeve kronike të veshkave, do të kontaktohen nga institucionet shëndetësore dhe do të thirren për ekzaminim falas. Skriningu do të përfshijë këto qytete: Tetovë, Gostivar, Kërçovë, Strugë, Ohër, Dibër, Manastir, Prilep, Kavadar, Veles, Zhelezara, Vizbegovë, Dellçevë, Gjevgjeli, Shtip, Koçani, Strumicë, Kumanovë dhe Kriva Pallankë.

Presim realizimin maksimal të projektit, dhe rrjedhimisht parandalimin më të madh të sëmundjes kronike të veshkave (SKV) në të ardhmen, pjesëmarrjen në hetimet në kohë, ngadalësimin e progresionit, terapinë e duhur dhe të kontrolluar, si dhe potencialin për reduktim të ndjeshëm të sëmundshmërisë dhe vdekshmërisë nga sëmundja kronike e veshkave dhe komplikimet e saj.

Apelojmë tek qytetarët që ta shfrytëzojnë këtë mundësi dhe të ndikojmë në përmirësimin e shëndetit të veshkave tona.