“Diskutimet në këtë takim ministror të Kartës SHBA-Adriatik janë dëshmi e përkushtimit tonë të fuqishëm për avancimin e bashkëpunimit në fushën e sigurisë dhe promovimin e paqes, stabilitetit dhe marrëdhënieve të mira fqinjësore në rajonin tonë,” tha ministri i Mbrojtjes, Vllado Misajllovski, i cili sot (4 dhjetor) mori pjesë në takimin ministror të Kartës SHBA-Adriatik në Tiranë.
Ministri, gjatë sesioneve të punës së takimit, theksoi se përforcimi i sigurisë dhe stabilitetit rajonal është i varur nga bashkëpunimi politik dhe ushtarak midis vendeve të Ballkanit dhe përkushtimi i tyre ndaj proceseve integruese evropiane dhe euroatlantike. Bashkëpunimi brenda grupit A5, tha Misajllovski, është praktik dhe dërgon një mesazh të qartë se popujt tanë duan të jetojnë në paqe, siguri dhe stabilitet. Ai e quajti Kartën SHBA-Adriatik një forum të suksesshëm për konsultime midis vendeve me vlera të përbashkëta demokratike.
Misajllovski bëri thirrje për qasje pragmatike ndaj mundësive për aktivitete të përbashkëta, veçanërisht në përballjen me kërcënimet hibride dhe kibernetike, menaxhimin e krizave dhe përballimin e fatkeqësive natyrore. Në lidhje me aktivitetet e ardhshme, ministri theksoi se vendet anëtare duhet të vazhdojnë përpjekjet për të identifikuar mundësi të reja bashkëpunimi, duke përmendur fushat si ndërtimi i rezistencës dhe mbrojtja kibernetike.
Zbatimi i Planit të Veprimit të Kartës SHBA-Adriatik për vitin 2024 në një situatë komplekse të sigurisë, tha ai, reflekton vendosmërinë tonë për të zgjeruar fushën e bashkëpunimit të përbashkët.
Ministri Misajllovski, së bashku me përfaqësuesit e tjerë të vendeve anëtare të A5, nënshkruan një deklaratë të përbashkët pas takimit.
Në kuadër të takimit ministror, pasdite ministri Misajllovski do të zhvillojë takime të veçanta me homologun e tij shqiptar, ministrin Piro Vengu, dhe me ndihmëssekretaren amerikane të mbrojtjes për çështje të sigurisë ndërkombëtare, Selest Vallander.
Karta SHBA-Adriatik u themelua në vitin 2003 me Kartën e Partneritetit midis vendit tonë, SHBA-së, Shqipërisë dhe Kroacisë. Në formatin A5, ajo ekziston që nga viti 2009, kur iu bashkuan edhe Mali i Zi dhe Bosnja e Hercegovina. Vendet vëzhguese të A5 janë Sllovenia, Kosova dhe Serbia. Qëllimi i kësaj nisme është një qasje e përbashkët dhe e koordinuar për përmbushjen e kritereve dhe standardeve të NATO-s, avancimin e bashkëpunimit në Evropën Juglindore dhe forcimin e paqes, demokracisë dhe stabilitetit në rajon.
