Mirëdita edhe nga unë, për mua është gjithmonë nder të jem i ftuar në ngjarje kaq të bukura siç është kjo sot këtu. Nuk kam çfarë të shtoj përveç asaj që thanë kryetari i komunës dhe investitori, përveç se t’ju uroj fat dhe punë të suksesshme dhe që ky projekt të realizohet sa më shpejt. Plani i investitorit është shumë ambicioz, por jo i parealizueshëm, sepse deri më tani, siç e përmendi vetë investitori në fjalimin e tij, falë ekipit ambicioz dhe punës ambicioze të kryetarit të Komunës së Gjevgjelisë, ky projekt ka arritur në këtë fazë ku ndodhet sot, të vendosim gurthemelin e një investimi me vlerë, siç dëgjuat, rreth 20 milionë euro. Nga bisedat që zhvillova, mësova disa detaje të tjera, si p.sh., se fillimisht do të kemi 350 vende të reja pune, me një kapacitet maksimal deri në 500.

Kjo pikë është me të vërtetë e rëndësishme, sepse rreth 15 milionë automjete kalojnë çdo vit këtu, duke ofruar një mundësi të madhe për biznes, për zgjerim dhe për zhvillimin e mëtejshëm të investimit.

Për Gjevgjelinë, kjo ka një domethënie të madhe kështu që si Kryetar i Qeverisë, unë besoj se gjithmonë kur ndërtohen objekte të tilla në Maqedoni, ne jemi këtu për të ndihmuar, për të përshpejtuar këtë proces dhe për të zhbllokuar çdo pengesë, në mënyrë që këto investime të bëhen realitet.

Qëllimi ynë, i përsëritur disa herë në opinion, është që këtë vit për herë të parë të arrijmë një rekord, duke tejkaluar numrin e investimeve, i cili do të tejkalojë një miliard euro dhe me këtë si shtet të jemi ndër tre të parët për kokë banori kur bëhet fjalë për investimet e huaja.

Pra, edhe një herë, urime për investitorin për vendosmërinë, falënderime për komunën, administratën dhe të gjithë ata që ndihmuan që ky investim të arrijë në këtë fazë ku është sot.