Të nderuar përfaqësues të mediave,
Të dashur miq,

Sot jemi këtu për të përmbushur edhe një premtim nga Programi i kësaj Qeverie.

Gjatë vitit të kaluar, Ministria e Vetëqeverisjes Lokale, si kurrë më parë, e ka justifikuar rolin e saj si partner i vërtetë i çdo komune dhe si motor i zhvillimit të balancuar rajonal.

Me përgjegjësi pohoj se kjo ka sjellë forcimin e dialogut politik mes pushtetit qendror dhe atij lokal, dhe dëshmi për këtë janë iniciativat që Qeveria gjatë vitit të kaluar i ka zbatuar për mbështetjen e komunave.

Nëpërmjet kontakteve të drejtpërdrejta dhe vizitave në komuna, bëmë një vlerësim të thelluar të gjendjes dhe identifikuam qartë vështirësitë kryesore në realizimin e kompetencave komunale.

Komunat përballen me sfida serioze si:
- mungesa e kapaciteteve administrative,
- mundësitë e kufizuara për zhvillim ekonomik, dhe
- infrastruktura e pamjaftueshme.

E gjitha kjo ndikon drejtpërdrejt në cilësinë e jetës së qytetarëve.

Si përgjigje ndaj kësaj, u realizuan dy thirrje publike për projekte infrastrukturore në komuna, si masë ndërhyrëse për tejkalimin e problemeve më akute.

Megjithatë, ajo që po ashtu na shqetëson janë kapacitetet e komunave për përgatitjen e projekteve për tërheqjen e fondeve dhe cilësia e shërbimeve që ato u ofrojnë qytetarëve.

Për t’iu përgjigjur këtij sfidimi disa dekadash, është i nevojshëm një qasje e sistematizuar dhe lidhja e masave e aktiviteteve që deri tani janë zbatuar në një masë të caktuar, por për shkak të mungesës së koherencës mes tyre, nuk janë arritur rezultatet e dëshiruara.

Kësaj radhe, koncepti që ofron kjo Qeveri ka të bëjë pikërisht me këtë – mbështetje e sistematizuar dhe e institucionalizuar për reformat e vetëqeverisjes lokale, përmes krijimit të një Qendre për Resurse për Mbështetjen e Komunave, e cila do të ofrojë zgjidhje të realizueshme dhe të qëndrueshme për forcimin e kapaciteteve komunale.

Kjo qendër paraqet një mekanizëm që siguron mbështetje afatgjatë, profesionale dhe të qëndrueshme për të gjitha komunat e vendit. Qëllimi i saj është adresimi i drejtpërdrejtë i dobësive: mungesa e ekspertizës administrative, bashkëpunimi i dobët ndërkomunal dhe shfrytëzimi i pamjaftueshëm i resurseve që kanë komunat.

Qendra do të sigurojë mbështetje që do të garantojë rritjen e kapaciteteve të vetëqeverisjes lokale, gjë që do të sjellë shërbime lokale më cilësore për çdo qytetar.

Deri në prill 2026, do të fokusohemi në këto aktivitete përgatitore:
- Krijimin e një liste ekspertësh që do të jenë në dispozicion për komunat sipas nevojës për tejkalimin e sfidave në ofrimin e shërbimeve;
- Përgatitjen e një udhëzuesi praktik për kryetarët e ardhshëm të komunave, që do të përmbajë hapa konkretë që nga organizimi i administratës, planifikimi financiar e buxhetor, deri te realizimi i projekteve kapitale, komunikimi me qytetarët dhe puna e këshillit komunal;
- Udhëzime për tejkalimin e rekomandimeve të konstatuara nga Zyra Shtetërore e Revizionit si dobësi në komunat gjatë periudhës së kaluar;
- Përgatitjen e një platforme digjitale që do të shërbejë si mjet interaktiv për komunat, përmes së cilës do të mund të kërkojnë dhe marrin përgjigje shpejt dhe në mënyrë efikase;
- Nxitjen e bashkëpunimit ndërkomunal.

Me këtë iniciativë po ndërtojmë bazën për komuna më efikase dhe më të forta.

Qendra e Resurseve nuk fillon nga zero. Ajo paraqet vazhdim dhe institucionalizim të projektit tetëvjeçar “Zhvillim i qëndrueshëm dhe gjithëpërfshirës rajonal”, i financuar nga Qeveria e Zvicrës.

Me këtë rast dua të shpreh mirënjohje të veçantë për Ambasadën e Zvicrës, e cila përmes iniciativave konkrete e mbështet vazhdimisht zhvillimin lokal të qëndrueshëm. Jam i lumtur që kemi mundësinë të integrojmë praktikat e tyre të mira në politikat tona dhe kështu të afrojmë politikat për zhvillim lokal e rajonal me rregullativat dhe konceptin e Politikës Rajonale Evropiane.

Në kontekst të mbështetjes partnere për themelimin e Qendrës së Resurseve për mbështetjen e Komunave, me kënaqësi dua të theksoj se kjo iniciativë është njohur si perspektive edhe nga Delegacioni i Bashkimit Evropian në Maqedoni, i cili përmes projektit “BE për Komunat” do të zbatojë aktivitete për forcimin e kapaciteteve të komunave si pjesë e konceptit të Qendrës së Resurseve.

Dhe sigurisht, mbështetja nga Qeveria jonë, e zbatuar përmes UNDP-së, do të jetë një vlerë e shtuar për sigurimin e qëndrueshmërisë dhe zhvillimit të mëtejshëm të Qendrës së Resurseve.

Jam i bindur se me këtë qendër të resurseve do të ndërtojmë vetëqeverisje lokale më të fortë, do të sigurojmë zhvillim më të balancuar dhe do të krijojmë kushte më të mira për jetën e qytetarëve në të gjitha pjesët e vendit.

Unë personalisht, në kuadër të mandatit tim si Ministër i Vetëqeverisjes Lokale, mbetem pa rezervë i përkushtuar dhe në dispozicion për iniciativa të reja që do të sjellin ndryshim në cilësinë e jetës së qytetarëve.

Ju faleminderit për vëmendjen dhe qëndroj në dispozicion nëse keni pyetje shtesë.