Kryeministri Zoran Zaev pas drekës së punës me liderët e Ballkanit Perëndimor me Kancelaren gjermane Angela Merkel, e vizitoi Qendrën e re Kulturore Informative të Maqedonisë së Veriut në Tiranë, ku dha deklaratë për mediat.

Deklaratën e Kryeministrit Zaev ua përcjellim në tërësi:

“Me hapjen e Qendrës Kulturore Informative të Maqedonisë së Veriut këtu në Tiranë, shtuam edhe një hallkë në spektrin e gjerë për bashkëpunim dhe përforcim të miqësisë mes Shqipërisë dhe Maqedonisë së Veriut.

Falë mbështetjes së Kryeministrit Edi Rama, si dhe vullnetit të fuqishëm për të zbatuar këtë projekt në Ministritë e Punëve të Jashtme dhe Kulturës të të dy vendeve, Qendra Kulturore Informative e Maqedonisë së Veriut në Tiranë filloi të funksionojë.

Realizuam me sukses një ide që kemi filluar ta hartojmë dhe ta ndërtojmë që nga fillimi i mandatit të kësaj Qeverie në vitin 2017.

Ishim të vendosur për të filluar të shkruajmë faqe të reja miqësie mes Maqedonisë së Veriut dhe Shqipërisë. Ne pranuam se me një program kulturor më intensiv dhe më të larmishëm ne mund të japim një kontribut serioz në pasurimin dhe modernizimin e marrëdhënieve tradicionalisht të mira mes dy vendeve.

Hapja e Qendrës Kulturore Informative të Maqedonisë së Veriut në Tiranë do të kontribuojë në popullarizimin dhe prezantimin e traditës, kulturës dhe artit të vendit tonë në Shqipëri, si dhe do të sigurojë informacion në kohë dhe origjinal për qytetarët për tendencat aktuale kulturore në vendin tonë.

Do të jetë një urë për afrimin dhe njohjen reciproke mes popujve të të dyja vendeve.

Qendra Kulturore Informative e Maqedonisë së Veriut do të jetë një vend për takime dhe një vend për inicimin e ideve të reja për aktivitete të shumta reciproke në fushën e kulturës në aktivitetet muzikore, dramaturgjike, letrare dhe botuese.

Qendra Kulturore Informative është një vend tjetër për prezantimin dhe afirmimin e pjesëmarrjes tradicionale të poetëve dhe shkrimtarëve shqiptarë në ngjarjet letrare në Republikën e Maqedonisë së Veriut, siç janë Mbrëmjet e Poezisë në Strugë ose për prezantimin e letërsisë maqedonase në Panairin Ndërkombëtar të Librit në Tiranë.

Kjo hapësirë ​​e mrekullueshme do të jetë një pikë për performanca dhe takime gjatë vizitave të teatrove maqedonase në Tiranë dhe në qytete të tjera në Shqipëri, si dhe një vend për ekspozita, koncerte dhe takime të artistëve muzikor, të artit dhe artistëve të tjerë gjatë vizitave të tyre  në Shqipërinë mike.

Tani qytetarët e Tiranës dhe të gjithë Shqipërisë në Qendrën Kulturore Informative të Maqedonisë së Veriut kanë një vend për t'u njohur me kulturën maqedonase dhe të gjitha informacionet e tjera në lidhje me shumë përmbajtje me interes për Maqedoninë e Veriut.

Në Qendrën Kulturore Informative në Tiranë, maqedonasit në Shqipëri bëhen me një vend ku ata janë gjithmonë të mirëpritur të jenë në kontakt të drejtpërdrejtë me proceset kulturore dhe të tjera në Maqedoninë e Veriut.

Me këtë rast, do të doja të theksoja se ne do të bëjmë gjithçka të nevojshme për të përshpejtuar procesin e hapjes së Qendrës Kulturore Informative të Shqipërisë në Shkup.

Duam që sa më shpejtë të vendosim reciprocitet për prezantimin e kulturës shqiptare në Maqedoninë e Veriut, duke organizuar ngjarje të ndryshme, ekspozita, ligjërata letrare dhe shkencore, shfaqje filmash, promovim të mediave dhe ofrim të shërbimeve të informacionit për qytetarët e interesuar.

Këto nisma janë shprehje serioze e miqësisë së thellë dhe të sinqertë mes dy vendeve.

Ato janë një shprehje e frymës evropiane që ruhen dhe afirmohet në mënyrë autentike nga Shqipëria dhe Maqedonia e Veriut si vende fqinje që respektojnë dhe praktikojnë së bashku vlerat evropiane për fqinjësi të mirë.

Këto vlera janë dëshmi se të dy vendet janë pjesë e familjes evropiane, se ato përkasin atje dhe se me shumë kritere të plotësuara, ato zyrtarisht meritojnë vendin e tyre në shtëpinë e përbashkët - Bashkimin Evropian.

Ju falënderoj dhe ju uroj punë të suksesshme në Qendrën Kulturore Informative të Maqedonisë Veriut në Tiranë."