Zëvendëskryeministri Bytyqi në promovimin e „Top 100” kompanive anëtare të Odës Ekonomike të Maqedonisë Veri-Perëndimore - Kompanitë e suksesshme duhet të theksohen dhe të vlerësohen

Zëvendëskryeministri i Qeverisë, përgjegjës për çështje ekonomike, koordinim me resorët ekonomikë dhe investimet, Fatmir Bytyqi, mori pjesë në ngjarjen për promovimin e kompanive „Top 100”, organizuar nga Oda Ekonomike e Maqedonisë Veri-Perëndimore, e cila tradicionalisht u jep mirënjohje kompanive anëtare më të suksesshme të kësaj ode.

Zëvendëskryeministri Bytyqi, i cili në të kaluarën ishte pjesë e strukturave drejtuese të Odës Ekonomike të Maqedonisë Veri-Perëndimore, theksoi se ngjarje të tilla janë veçanërisht të rëndësishme për të theksuar suksesin e kompanive dhe për të stimuluar rritjen dhe zhvillimin e mëtutjeshëm, duke pasur parasysh se zhvillimi i ekonomisë ka një ndikim pozitiv në zhvillimin e përgjithshëm ekonomik të vendit.

„Shpesh harrojmë të lavdërojmë dhe shpërblejmë një punë të kryer me sukses, gjithashtu, nuk duhet të neglizhojmë se në dy vitet e fundit po përballemi me një krizë të paparashikueshme shëndetësore dhe ekonomike e cila ka vënë në provë qëndrueshmërinë, këmbënguljen dhe shpirtin tonë luftarak që sot u jep këtyre çmimeve peshë shtesë”, nisi zëvendëskryeministri në fjalimin e tij para të ftuarve të pranishëm.

Bytyqi shtoi se e gëzon fakti për rezultatet pozitive të arritura nga „Top 100” të kompanive anëtare të Odës në vitin 2020 dhe theksoi se përkundër krizës shëndetësore dhe ekonomike, këto kompani kanë bërë xhiro më të madhe, eksport, rritje të numrit të të punësuarve dhe fitime më të larta, krahasuar me vitin 2019.

„Për rritjen e kompanive në Odën Ekonomike të Maqedonisë Veri-Perëndimore flasin shifrat që rriten çdo vit. Në vitin 2018 xhiroja vjetore e 100 TOP kompanive më të suksesshme ishte 750 milionë, në vitin 2019 ato kishin një xhiro vjetore prej 900 milionë dhe në një vit krize në të cilin shumica e ekonomive patën një rënie 100 TOP kompanitë më të suksesshmet kanë një rritje prej 2,61 % dhe arritën një nivel prej 920 milionë euro xhiro. Shifra këto, që tregojnë se sipërmarrësit tanë dinë dhe janë në gjendje të gjejnë mundësi për t’u rritur edhe në kohët më të vështira. Gjithashtu, rezultate shumë të mira pozitive janë reflektuar edhe në treguesit e fitimit neto i cili është në rritje të vazhdueshme. Nëse në vitin 2018 fitimi neto i realizuar i 100 kompanive më të suksesshme ishte 56,5 milionë euro, në vitin 2019 66 milionë euro, në periudhën e COVID-it në vitin 2020 keni arritur rritje prej 9,87 % dhe keni arritur një fitim neto prej 73 milionë euro”, theksoi Bytyqi.

Zëvendëskryeministri tha se suksesi i këtyre kompanive është i rëndësishëm, sepse ato japin një shembull pozitiv dhe inkurajim për të gjithë të tjerët dhe krijojnë një kulturë të motivimit të biznesit dhe promovojnë konkurrueshmëri të shëndoshë. E gjithë kjo ndikon në përmirësimin e produktivitetit, rritjen e numrit të të punësuarve, si dhe në rritjen e përgjithshme ekonomike.

„Pikëpamjet e mia për zhvillimin ekonomik nuk janë ndryshimet që nga koha kur kam qenë pjesë e odës dhe bazohen në ristrukturimin e ekonomisë vendase në një ekonomi të re zhvillimi të bazuar në prodhimin me vlerë të shtuar, pra inkurajimin e kompanive që kryesisht punojnë në tregti për t'u ristrukturuar në prodhim, përpunim, kërkim dhe zhvillim ose në sektorë që krijojnë vlerë të shtuar më të madhe. Qeveria përmes masave mbështetëse të investimeve siguron mbështetje deri në 50 % të kostove operative për hyrjen në këta sektorë, gjë që do të rrisë PBB-në tonë, numrin e të punësuarve, eksportet dhe sigurisht standardin e jetesës së qytetarëve”, nënvizoi zëvendëskryeministri.

Ai shtoi se Maqedonia e Veriut dhe i gjithë rajoni i Ballkanit Perëndimor kanë potencial të madh për rritje dhe zhvillim ekonomik dhe se me punë të përbashkët të Qeverisë, ekonomisë dhe partnerëve ndërkombëtarë, duhet të shfrytëzohet shansi për zhvillim më të shpejtë dhe të qëndrueshëm ekonomik të vendit dhe rajonit.

„Në drejtim të mbështetjes, rritjes dhe zhvillimit tuaj, unë kam folur tashmë në takimet e mia me politikanë dhe biznesmenë të rajonit dhe sot dua të hap këtë diskutim me ju, e që është krijimi i zinxhirëve të fortë të vlerave për kompanitë në vendin tonë, por dhe duke u lidhur me mbarë rajonin. Ky është avantazhi ynë konkurrues, të cilin duhet ta përdorim për të dalë më të fortë dhe më të qëndrueshëm në periudhën pas COVID-it. Rifokusimi në stimulimin e investimeve në tregun e Ballkanit Perëndimor do të krijojë një treg rajonal elastik dhe të qëndrueshëm, i cili do të jetë konkurrues në tregun evropian apo botëror dhe në të njëjtën kohë do të mbështesë dhe sigurisht do të rrisë dhe forcojë ekonomitë kombëtare. Tashmë po flasim për krijimin e masave stimuluese dhe afirmative që do të nxisin zhvillimin e dëshiruar ekonomik përmes forcimit dhe sinergjisë së zinxhirit të vlerës për të shfrytëzuar dhe kapitalizuar potencialin e plotë që na hapet përmes "Near shoring" ose afrimit të zinxhirëve të furnizimit më afër kompanive të mëdha, fillimisht evropiane po edhe atyre botërore”, përfundoi në fjalimin e tij zëvendëskryeministri për çështje ekonomike, Fatmir Bytyqi.