Kryetari i Qeverisë së Republikës së Maqedonisë së Veriut, Dimitar Kovaçevski, duke iu përgjigjur pyetjes së gazetarëve për opinion lidhur me njoftimin për liderin e partisë politike bullgare “Ima Takov Narod”, Slavi Trifunov, për largim nga koalicioni qeveritar në Bullgari, tha se Maqedonia e Veriut është një partner i besueshëm në negociata, kërkon një zgjidhje të sinqertë dhe të qëndrueshme për anëtarësimin në BE.

“Ne jemi një vend që në pesë vitet e fundit kemi dëshmuar se mund të zgjidhë të gjitha çështjet e hapura me fqinjët e tij”, tha Kovaçevski, i cili nënvizoi se falë Marrëveshjes së Prespës jemi anëtar i NATO-s dhe një vend që është në prag të hapjes së negociatave me Bashkimin Evropian dhe që nuk ka çështje të hapura me të gjithë fqinjët përveç Bullgarisë.

Ai nënvizoi se Qeveria ka diskutuar dhe ofruar zgjidhje gjatë pesë muajve të fundit, ka shkëmbyer ide me Bullgarinë fqinje për të tërhequr veton dhe për të arritur një marrëveshje të qëndrueshme të bazuar në vlerat evropiane, duke ruajtur dinjitetin dhe parimet e marrëdhënieve të fqinjësisë së mirë në frymë të së cilës kemi dhe marrëveshjen e fqinjësisë së mirë me Bullgarinë mbi bazën e së cilës ndërtohen marrëdhëniet me këtë vend.

“Ne në asnjë moment nuk e instrumentalizuam çështjen e negociatave me Bullgarinë dhe anëtarësimin në BE, nuk e politizuam në mënyrë të njëanshme dhe nuk e shfrytëzuam për përdorim të brendshëm politik, ndryshe nga pala tjetër që e ka instrumentalizuar vazhdimisht këtë çështje, e ka përdorur për përdorim të brendshëm politik. Edhe pas pesë muajsh, ne si vend jemi ende të hapur për të biseduar me udhëheqësinë e BE-së sepse jemi një partner i besueshëm si për fqinjët tanë ashtu edhe për BE-në”, tha Kovaçevski, i cili përsëriti se ne jemi një vend që edhe marrëdhëniet ndërkombëtare dhe marrëdhëniet e brendshme  ne i kemi ndërtuar në nivelin më të lartë evropian dhe se çështja e koalicionit qeverisës të Bullgarisë është çështje e brendshme politike e atij vendi.