Bashkimi Evropian, Maqedonisë së Veriut do t’i japë mbështetje financiare për përballje me krizën energjetike. Kësti i parë është në vlerë prej 80 milionë euro, ndërsa mjetet do të jenë të disponueshme nga janari i vitit 2023. Siç kumtoi Kryeministri Dimitar Kovaçevski në konferencën e përbashkët për shtyp me Kryetaren e Komisionit Evropian, Ursula fon der Lajen.

“Biseduam me Kryetaren e Komisionit Evropian, biseduam edhe në nivel të eurokomisarëve për financa dhe në nivel të eurokomisarëve për energjetikë. Në të gjitha këto bisedime morën pjesë edhe ministrat e ekonomisë dhe financave. Kësti i parë i ndihmës është 80 milionë euro, grant ky që do të përdoret për mbështetje buxhetore në vend deri në fund të vitit. Në dy muajt e ardhshëm do të kryhen të gjitha formalitetet dhe tashmë nga janari do të mund të tërheqim fondet për mbështetje buxhetore. Kjo do të thotë se ato mjete financiare në muajt më të vështirë, janar, shkurt, mars, mund të përdoren për të përballuar krizën energjetike, gjegjësisht për qëllimet që do të parashikojë buxheti me buxhetin e vitit 2023, i cili së shpejti do të miratohet nga Qeveria. dhe do të hyjë në Kuvend”, theksoi kryeministri Kovaçevski në konferencën e përbashkët për shtyp në Qeveri.

Kryeministri theksoi se kjo nuk do të jetë ndihma e vetme, sepse më pas siç kumtoi Kryetarja e Komisionit Evropian Fon der Lajen, tashmë po shqyrtohet ndihma e re rajonale për financimin e projekteve kapitale për lidhjen e gazit dhe për sigurimin e burimeve të reja të furnizimit me energji elektrike. Këtu, tha, Kovaçevski në radhë të parë i referohet projekteve të mëdha që janë planifikuar në rajon për ndërtimin e termocentraleve të gazit dhe termocentraleve të tjera energjetike për të stabilizuar prodhimin e energjisë elektrike në të gjithë rajonin e Ballkanit Perëndimor.