"Sa jam i informuar nga Ministria e Punëve të Brendshme, hetimi është ende në proces dhe supozoj se sipas detyrës zyrtare komunikon me PTHP-në dhe në kuadër të atij hetimi supozoj se ose do të ketë ose nuk do të ketë elemente të reja, do të shohim, PTHP-ja do të deklarohet", iu përgjigj kryetari i Qeverisë, Hristijan Mickoski, deputetit të BDI-së, Blerim Bexheti, në seancën e sotme të Kuvendit për pyetjet e deputetëve në lidhje me tragjedinë në Komunën e Koçanit.  

Kryeministri Mickoski theksoi se PTHP-ja duhet ta përfundojë hetimin dhe të përcaktojë nëse personat e arrestuar kanë kryer vepër penale apo jo, duke nënvizuar se ai nuk mund të akuzojë askënd, ashtu siç pretendon Bexheti se ai ka akuzuar para kohe.  

"Unë kurrë nuk jam shprehur ashtu siç thoni ju, të akuzoj para kohe edhe pse unë personalisht edhe si parti politike dhe një pjesë e madhe nga ne, e dinë se çfarë do të thotë të jesh viktimë e një lloji të tillë të kualifikimeve politike, e kemi ndier këtë në shtatë vitet e fundit. E dimë saktësisht si duket dhe nuk do t’ia bënim askujt, sepse për ne vlen një rregull mos u bëj të tjerëve atë që nuk do të doje të të bënin ty.  

Kështu që hetimi është në proces, PTHP-ja supozoj se do të deklarohet kur ta përfundojë dhe nëse e përfundon atë hetim, supozoj dhe ju si profesionistë të së drejtës e dini këtë më mirë se unë, do të deklarohet nëse personat e ndaluar aktualisht kanë dyshim të bazuar për kryerjen e një vepre penale apo jo. Unë nuk do të hyja në detaje, as nuk do të akuzoja, as nuk kam akuzuar, siç thoni ju", i porositi Mickoski Bexhetit.  

Mickoski theksoi se licenca të falsifikuara të lëshuara nga sektori i hotelierisë nën Ministrinë e Ekonomisë dhe Punës janë konstatuar nga ana e Inspektoratit Shtetëror të Tregut në të gjithë vendin.  

"Është e vërtetë se publikisht kam thënë se është e mundur të ndikoj në hetimin nëse them se ekziston një dokument i falsifikuar, përkatësisht një licencë për të njëjtin klub në të cilin ndodhi ky incident tragjik. Dhe është e vërtetë se pasi u kontrollua në arkivin e Ministrisë së Ekonomisë dhe Punës, nën atë numër arkivor ishte i regjistruar një dokument tjetër. Unë nuk e shpika këtë, këtë e tregoi pronari i klubit gjatë vetë hetimit. A do të ndikojë kjo pozitivisht apo negativisht, nuk e di, ashtu siç, zoti Bexheti, ISHT-ja dhe Ministria e Ekonomisë dhe Punës konstatuan dhjetëra dokumente të ngjashme për klube të tjera në Maqedoni.  

Ja, nëse po ndikojmë në mënyrë selektive, siç thoni ju, në këtë klub, atëherë çfarë ndodh me dhjetëra dokumente të tilla për dhjetëra klube të natës në të gjithë vendin", pyeti Mickoski, duke theksuar se këto dokumente janë lëshuar nga Ministria e Ekonomisë, përkatësisht sektori i hotelierisë.  

Mickoski theksoi se që nga viti 2008, ministri i ekonomisë ka qenë gjithmonë i propozuar nga partia politike BDI.  

"Që nga viti 2008 e këtej, ministrat kanë qenë të propozuar nga BDI-ja dhe nëse shihet fillimi i këtij klubi, kur ai filloi të funksionojë në vitin 2012 ose 2013, përsëri ministri në atë ministri ka qenë i propozuar nga BDI-ja. Që nga ajo kohë e deri më tani, për aq kohë sa ka ekzistuar ky klub, ministri ka qenë i propozuar nga BDI-ja. Kështu që, lind pyetja se kush i ka nënshkruar dhe kush i ka lëshuar këto dokumente, aty qëndron me autorizim të dikujt, me autorizimin e ministrit, ndërsa disa prej tyre madje janë nënshkruar personalisht nga ministri, por këtë do t'ia lejmë hetimit ta tregojë dhe të japë përgjigje", tha Mickoski.