Të nderuar qytetarë, pjesëtarë të policisë, përfaqësues të institucioneve, media, zonja dhe zotërinj,

Sot, e shënojmë jo vetëm historinë e policisë maqedonase, por edhe misionin e saj të gjallë – të jetë mburojë e qytetarëve, rojtar i drejtësisë dhe simbol i shtetësisë.

Policia nuk është vetëm uniformë dhe detyrë zyrtare. Policia është njeri. Njeri që zgjohet më herët se të gjithë, del në terren dhe përballet me rreziqe nga të cilat ne të gjithë përpiqemi të mbrohemi. Ai njeri – polici – nuk mendon vetëm për sigurinë e tij, por edhe për tonën.

“Trimëria nuk është mungesa e frikës, por fitorja mbi të”, ka thënë Nelson Mandela. Dhe trimëria e policëve tanë shfaqet çdo ditë – në çdo intervenim, në çdo patrullë, në çdo sakrificë të dhënë që ne të jemi të sigurt.

Nuk mundemi të mos përulemi para kujtimit të atyre që vulosën punën e tyre me jetën e tyre. Emrat e tyre janë të gdhendur në histori, por veprat e tyre jetojnë në çdo ditë tonën të sigurt. Të mos harrojmë: pas çdo distinktivi qëndron një familje që pret, lutet dhe shpreson që i dashuri i tyre të kthehet në shtëpi.

Të nderuar,

Kujtojmë – dhe nuk duhet të harrojmë – si dukej përditshmëria jonë disa vite më parë.

Kriminelët shëtisnin lirshëm, shteti heshtte, ndërsa qytetarët jetonin me ndjenjën e pafuqisë. Kishte një kohë kur institucionet përdoreshin si vegël për interesa personale dhe politike, e jo për drejtësi. Mesazhet “do ta rregullojmë” dhe “do të telefonoj” ishin më të zëshme se ligji.

Por ajo kohë ka përfunduar.

Dua sot, publikisht dhe me zë të lartë të them:

Në këtë shtet nuk ka më vend për lidhje, nepotizëm dhe mbrojtje nga përgjegjësia. Ligji vlen për të gjithë – pa marrë parasysh nëse bëhet fjalë për një qytetar të zakonshëm, funksionar apo biznesmen.

Fuqia e shtetit nuk matet me privilegjet e individëve, por me faktin nëse drejtësia arrin te të gjithë – te më të fuqishmit dhe te më të margjinalizuarit.

Ne sot dërgojmë një mesazh të fortë: nuk ka kompromis me krimin.

Korrupsioni dhe krimi i organizuar nuk kanë vend në një shtet që dëshiron të ecë përpara. Jemi të vendosur, si Qeveri, si institucione, por mbi të gjitha si shoqëri – që kjo betejë të zhvillohet me përkushtim të plotë, me partnerë të vërtetë dhe me duar të pastra.

“Drejtësia mund të jetë e ngadaltë, por kurrë nuk duhet të jetë e verbër,” thonë. Detyra jonë është t’i hapim sytë – përmes një policie profesionale, etike dhe të pakorruptueshme. Një polici që do të ndjekë krimin, pa marrë parasysh nëse qëndron pas një maske, pozite apo parash.

Dhe pikërisht për këtë, investojmë dhe do të vazhdojmë të investojmë tek ju – forcat tona policore. Do të investojmë në teknologji, pajisje, trajnim, por edhe në dinjitetin që ju takon.

Misioni juaj është i shenjtë – të ruani rendin, por edhe të ktheni besimin tek populli.

“Kur drejtësia hesht, padrejtësia bëhet e zëshme,” ka thënë një njeri i urtë. Por me ju – me punën tuaj, përkushtimin dhe sakrificën tuaj – padrejtësia mbetet pa vend. Ajo tërhiqet përballë një policie të ndershme, të vendosur dhe moderne.

Të dashur qytetarë,

Siguria nuk është vetëm statistikë. Është ndjenjë. Është kur një prind pa frikë e dërgon fëmijën e tij në shkollë. Kur një nënë kthehet e qetë në shtëpi në orët e vona. Kur çdo qytetar e di që shteti qëndron pas tij. Këtë ndjenjë na e dhuroni ju – policët.

Prandaj, me zemër plot, ju urojmë:

Gëzuar Ditën e Policisë Maqedonase!

Ju falënderojmë për çdo natë pa incidente, për çdo jetë të shpëtuar, për çdo kriminel që jep llogari për veprat e tij. Ju uroj shëndet, forcë dhe gjithmonë – kthim të sigurt në shtëpi.

Zoti ju bekoftë dhe Zoti e bekoftë Maqedoninë tonë.

Ruajeni Maqedoninë!