Kryetari i Qeverisë, Hristijan Mickoski, sonte në emisionin “Vetëm Intervistë” në Televizionin Kanal 5, duke folur për qëndrimin e Bullgarisë ndaj integrimit tonë evropian, tha se kërkesat e Bullgarisë nuk janë vetëm për përfshirjen e bullgarëve në Kushtetutë dhe se ajo është vetëm fillimi, e jo siç thotë edhe LSDM, që pastaj na pret rrugë e hapur.

“Le të bëjmë një përpjekje, dhe ajo përpjekje është që Parlamenti Evropian me shumicë votash të sjellë një vendim, ose një rezolutë, ose të jetë pjesë e një raporti, me të cilën do të njihet qartë identiteti dhe gjuha maqedonase si të veçanta”, tha Mickoski dhe shtoi:

“Kjo ndodhi edhe në kuadër të raportit të raportuesit Vajc. Para se të kalojë në AFET kishte një tjetër zhvillim. Atëherë nuk duhej të fshihej nga raporti, por të hiqej fjala ‘aktual’. Pastaj erdhi fjala ‘modern’ nga një grup i caktuar eurodeputetësh.”

Mickoski theksoi se figura të caktuara politike në Bullgari tregojnë qartë se ndryshimet kushtetuese nuk janë e vetmja pengesë në rrugën e Maqedonisë drejt BE-së.

“Ajo që kishin mundësi ta shihnin Evropa dhe bota është se ndryshimi i Kushtetutës nuk është e vetmja gjë që duhet ta bëjmë për të vazhduar. Në fakt, shumë figura të fuqishme politike në Bullgari e thonë këtë”, tha Mickoski.

Sipas tij, deklarata e Radevit se i vetmi kusht janë ndryshimet kushtetuese nuk është e saktë, sepse edhe në Marrëveshjen për fqinjësi të mirë nuk kishte asnjë kusht, ndërsa tani de facto kemi.

“Para disa ditësh dëgjova një deklaratë nga presidenti Radev, ku ai thotë se kushti i vetëm që duhet ta përmbush Maqedonia është të ndryshojë Kushtetutën. Ne në Marrëveshjen për fqinjësi të mirë nuk kishim asnjë kusht. Kemi një marrëveshje të nënshkruar me të cilën Bullgaria duhet të na përkrahë në kuadër të procesit të negociatave dhe anëtarësimit. Por morëm veto, sepse sipas tyre, ne nuk e kemi zbatuar marrëveshjen dhe nuk i kemi realizuar të drejtat e minoritetit bullgar në Maqedoni”, theksoi kryeministri.