Заменик претседателот на Владата Муса Џафери денеска се сретна со шефот на Мисијата на ОБСЕ во Скопје, амбасадорот Ралф Брет.

Актуелната ситуација во Македонија, интегративните процеси, зачленувањето во НАТО и ЕУ, како и меѓуетничките односи беа во фокусот на разговорот.

Вицепремиерот Џафери го повтори ставот дека спроведувањето на Охридскиот рамковен договор е услов за довербата меѓу етничките заедници и чекор кон зачленувањето во НАТО и ЕУ.

Во врска со последните случувања, Џафери и Брет заклучија дека е неопходен правичен и транспарентен судски процес за сите осомничени. Според нив, почитувањето на етничките, религиозните и културните вредности е основен услов за довербата меѓу различните етнички заедници во една мултиетничка држава. Само правичен и транспарентен процес ќе ги тргне, оценија, сите сомневања за колективните судски процеси.

Вицепремиерот Џафери и амбасадорот Брет ги повикаа цивилното општество, верските заедници, институциите и другите организации да дадат свој придонес за зачувување на толеранцијата, меѓуетничките и меѓурелигиските односи во земјата.