Комитетот за туризам при Владата на Република Македонија, вчера (четврток, 10.05.2012 година) ја одржа осмата седница со кој претседаваше  заменик претседателот на Владата на Република Македонија задолжен за економски прашања, г-дин Владимир Пешевски.

На седницата беше разгледан степенот на реализација на заклучоците кои се однесуваат на зголемување и подобрување на понудата на туристичките објекти, можностите за развој на алтернативниот туризам, како и повеќе информации за тековните активности од оваа сфера.

На Комитетот за туризам беше презентирана и предлог Програмата за промоција и поддршка на туризмот на Република Македонија за 2013 година, проектот за информирање на транзитните патници „Е75“, како и активностите за поддршка и промоција на здравствениот туризам во Република Македонија.

Дополнително, на седницата се анализираа и начинот и постапката за основањето автокамп, постапката за отуѓување на градежното земјиште наменето за автокамп, условите кои треба да ги исполнат корисниците на автокамповите и други прашања поврзани со оваа сфера.

Притоа, Комитетот донесе заклучок предлог Законот за автокампови да влезе во процедура за негово донесување.