Të nderuar pjesëtarë të mediave,

Të nderuar qytetarë

Sot, me rastin e përvjetorit të parë të Qeverisë, më paraqet nder dhe kënaqësi të madhe të ndaj me ju një pasqyrë të punës së Ministrisë së Ekonomisë dhe Punës në dymbëdhjetë muajt e fundit. Ky ishte një vit i sfidave, por edhe më shumë – një vit i punës, përkushtimit dhe orientimit të vërtetë drejt qytetarit. Politikat tona kanë një fije të përbashkët: përmirësimin e cilësisë së jetës, forcimin e tregut të punës dhe sigurimin e rritjes ekonomike dhe stabilitetit.

Plani operativ i punësimit për vitin 2025 paraqet dokument strategjik dhe vegël bartëse në luftën kundër papunësisë. Për këtë qëllim, siguruam buxhet rekord prej 2.5 miliardë denarësh – ose afërsisht 40 milionë euro. Ky plan është i orientuar drejt 16.000 qytetarë përmes një varg masash specifike: vetëpunësim, punësim përmes subjekteve juridike, trajnim praktik, zhvillim të shkathtësive dhe programeve të reja për kategoritë e vështira për t'u punësuar.

Me vëmendje të veçantë e theksoj Masën 1.1, e cila mundëson deri në 7.000 euro mbështetje të pakthyeshme për personat mbi 29 vjeç për të filluar biznesin e tyre. Për të rinjtë deri në 29 vjeç, kemi parashikuar deri në 10.000 euro përmes Masës 1.2, e me Masën 1A, persona të cilët bashkohen për të hapur biznes marrin mbështetje deri në 20.000 euro. Përmes Masës 3.1 – trajnim te një punëdhënës i njohur – të rinjtë përvetësojnë shkathtësi praktike drejtpërdrejt në vendin e punës, gjë që lehtëson punësimin e tyre afatgjatë.

Deri më tani, përmes katër njoftimeve publike, janë parashtruar 6.026 aplikime. Kjo është më shumë se një statistikë – është tregues i besimit dhe vendosmërisë së qytetarëve për të krijuar ndryshime në jetën e tyre.

Risi është masa “Punë publike”, me të cilën 400 persona me vështirësi për t'u punësuar janë të angazhuar në aktivitete si pyllëzim dhe mbrojtja nga zjarri, me kompensim mujor prej 24.000 denarë. Trajnimi për IT, gjuhët e huaja dhe kategoritë e vozitjes C, CE dhe D janë pjesë e një strategjie më të gjerë për të rritur shkathtësitë dhe gatishmërinë për tregun modern të punës.

Përmes Masës 2.1, mbështesim ndërmarrjet mikro, të vogla dhe të mesme, me grante prej 160.000 deri në 250.000 denarë për person. Kjo mbështetje synon kompanitë që punojnë persona nga kategoritë prioritare, duke përfshirë gratë, të rinjtë, personat me aftësi të kufizuara dhe romët. Thirrja është e hapur deri më 4 korrik, ndërsa aplikimet parashtrohen në Qendrat e punësimit.

Presionet inflatore kërkojnë përgjigje vendimtare. Miiratuam masë për kufizimin e shkallëzuar të marzhave për 102 grupe produktesh – mbi 1.000 artikuj. Norma e inflacionit u ul me 1.3% dhe çmimet e ushqimeve me 3% në mars 2025, dhe përmes masave të tjera që dhanë rezultatet e tyre, arritëm ulje të çmimeve dhe kursime reale për familjet.

Ministria e Ekonomisë dhe Punës monitoron vazhdimisht të dhënat dhe raportet e Bankës Kombëtare dhe Ministrisë së Financave, si dhe të gjithë faktorët e jashtëm, duke përfshirë zhvillimet gjeopolitike, si dhe lëvizjet e inflacionit në mënyrë që të mund të reagojë me mekanizmat e duhur ekonomikë në kuadër të kompetencave. Gjithashtu, për sa i përket çmimeve të produkteve ushqimore bazë, bëhen analiza në bazë të të dhënave dhe raporteve të Inspektoratit Shtetëror të Tregut, si dhe Entit Shtetëror të Statistikave, dhe mbahen konsultime brenda Qeverisë për të vlerësuar nëse dhe cilat masa do të ishin më të përshtatshme për mbrojtjen e mundshme të qytetarëve nga tronditjet e çmimeve ose rrjedhat tregtare. Është thelbësore që çdo vendim të jetë i drejtuar nga të dhënat, proaktiv dhe i drejtuar nga stabiliteti, me fokus në kategoritë e rrezikuara dhe sektorët kritikë.

Ligjërisht e ngritëm pagën minimale në mars të vitit 2025 – nga 22.567 denarë ajo u rrit në 24.379 denarë neto, që është një rritje prej rreth 8% dhe natyrisht mbështetje e drejtpërdrejtë për dhjetëra mijëra punëtorë në vend.

Për më tepër, si pjesë e zhvillimit ekonomik, jam krenar që arritëm të lëshojmë një licencë për kompaninë “Kiel” për të hapur një kapacitet të ri prodhimi në zonën industriale në Tetovë. Ky nuk është vetëm projekt investimi, por edhe konfirmim strategjik i besimit në ambientin e biznesit dhe klimës të vendit. Në rrjedhë janë katër investime të reja me qëllim krijimin e vendeve të reja të punës, stimulimin e ekonomisë lokale dhe rritjen e konkurrueshmërisë rajonale.”

Duke miratuar Ligjin për angazhim në punë, siguruam fleksibilitet dhe mbrojtje. Ligji lejon punësim sezonal dhe të përkohshëm në bujqësi, hotelieri dhe familje, ku punëtorët marrin sigurime shoqërore dhe pensionale, ndërsa punëdhënësit mund të punësojnë ligjërisht kategori të ndryshme qytetarësh.

Ndryshimet në Ligjin për Mbrojtjen e Konsumatorëve vendosën një detyrim për marketet për të publikuar çmimet në faqet e tyre të internetit. Kjo do të thotë transparencë më të madhe, konkurrencë të përmirësuar dhe informim më të madh të qytetarëve. Listat e çmimeve duhet të përmbajnë informacione të qarta për secilin produkt – çmimi me TVSH, zbritje, periudha e vlefshmërisë dhe arritshmërisë. Në periudhën e ardhshme, në bashkëpunim me Qeverinë, do të zhvillohet një aplikacion që do të krahasojë çmimet përmes një algoritmi dhe do t'u tregojë qytetarëve se cili produkt është më i lirë në afërsi të tyre.

Të nderuar,

Buxhet prej 45 milion denarësh ndahet për thirrjet publike që do të mbështesin zejtarinë, digjitalizimin, konkurrencën e industrisë, standardizimin (HALLALL, ISO), akreditimin e laboratorëve dhe organizatave joqeveritare që i mbrojnë konsumatorët.

Në fazën përfundimtare është prodhimi i shportës zyrtare konsumatore për familje katëranëtarëshe. Shporta do të shërbejë si bazë për përcaktimin e masave reale sociale dhe ekonomike, pa hapësirë për manipulime.

Janë definuar ndryshimet në Ligjin për Veprimtarinë Hotelierike, janë dërguar institucionet tjera kompetente për shqyrtim të mëtejshëm me qëllim vendosjen e kritereve më të rrepta për marrjen e licencave, rritjen e kontrolleve dhe përgjegjësive të përcaktuara qartë për të gjithë faktorët. Kjo është përgjigje ndaj ngjarjes tragjike në diskotekën "Puls", por edhe masë parandaluese për sigurinë e të gjithë qytetarëve.

Në kuadër të agjendës së reformës së BE-së, po ndryshojmë rregullat për përzgjedhjen e organeve mbikëqyrëse në shoqëritë tregtare, nga 28 taksat parafiskale, 25 janë optimizuar tashmë. Pavarësisht numrit të pamjaftueshëm të inspektorëve, po forcojmë shërbimet inspektuese – Inspektorati i Punës shënon rritje të numrit të kontrolleve me 20%, ndërsa Inspektorati i Tregut shënon rritje prej 15%.

Të nderuar të pranishëm,

Të gjitha këto masa janë rezultat i punës në grup, por edhe i dialogut me qytetarët, sektorin e biznesit, sindikatat dhe institucionet. Ministria e Ekonomisë dhe Punës mbetet e hapur për bashkëpunim dhe e vendosur për politika që do të sjellin rezultate reale. Do të vazhdojmë me fokus të njëjtë, angazhim të njëjtë dhe ritëm të njëjtë – për arsye se detyra jonë është e qartë: të ndërtojmë ekonomi stabile, të drejtë dhe të qëndrueshme.

Ju faleminderit.