Во рамки на дводневната официјална посета на Република Словенија, претседателот на Владата на Република Северна Македонија, Зоран Заев учествуваше на предавање и јавна дебата во организација на меѓународниот институт за балкански и средно-европски студии ИФИМЕС на којашто се зборуваше на тема „Република Северна Македонија приказна за успехот“.  Во јавната дебата учествуваа и директорите на институтот Зијад Бечировиќ и Бахатијар Аљаф.
 
Премиерот Заев со свое воведно обраќање ги поздрави присутните на јавната дебата.

 
„Владата успеа за само 22 месеци да ја возобнови демократијата, само пред 3 години бевме декларирани како заробена земја, со хибриден режим. Денеска имаме инклузивен дијалог со опозицијата за сите важни политички прашања“, рече премиерот Заев во своето обраќање.
 
Тој ги информираше присутните дека ние сме единствената земја од Западен Балкан којашто нема отворени билатерални проблеми со соседите а за тоа придонесе имплементацијата на Договорот од Преспа кој во комплексни услови донесе решение на проблемот со името и пријателство со Грција.
 
„Силно сме посветени да изградиме едно општество за сите - концепт кој ги почитува и ги издигнува различностите во нашето општество. Меѓуетничките релации се стабилни денеска. Во завршна фаза се политичките реформи, вклучувајќи ја реформата во правосудството, безбедносните служби, јавната администрација, и борбата против корупцијата како наш врвен приоритет“, истакна премиерот Заев и информираше дека до сега 13 земји го имаат ратификувано протоколот за членство и дека до крајот на 2019 се очекува заокружување на процесот со полноправно членство на нашата земја во НАТО на следниот Самит на НАТО во Лондон во декември.

Премиерот Заев нагласи дека стабилноста и реформите носат економски прогрес и како доказ на тоа информираше за највисоките странски директни инвестиции во 2018 година од 625 милиони евра.  

Во однос на нашето зачленување во НАТО премиерот Заев додаде дека очекувањата се со нашиот влез да се зајакне стабилноста и сигурноста на Југоисточна Европа и тоа ќе претставува добар пример за земјите од регионот, а воедно рече дека како земја ги споделуваме европските вредности и тоа го имаме покажано како земја која е посветен партнер во справувањето со мигрантската криза во 2015 и во многу НАТО мисии од 2002 година. Премиерот Заев рече дека земјата после 14 години чекање е подготвена и на економски и на политички план за започнување на преговори со ЕУ и дека нашите приоритети се во линија на нашата агенда за пристапување во ЕУ преку исполнување на сите барања на Европскиот Совет од јуни 2018, добиено е позитивно мислење од Венецијанската комисија за Законот за судови и Судски совет, избрана е нова Антикорупциска комисија во транспарентен и инклузивен процес, донесен е нов реформски пакет на закони за безбедносниот систем согласно ЕУ и НАТО стандардите, реформата во јавната администрација се случува низ целиот систем. 

„Испорачавме резултати, го имплементиравме Договорот од Преспа и направивме тешки реформи со која плаќаме висока политичка цена. Затоа силно веруваме дека Европскиот совет ќе донесе позитивна одлука за почеток на преговори со Република Северна Македонија за членство ова лето во јуни“, потенцираше премиерот Заев. 

Премиерот Заев додаде дека потребен е систем базиран на индивидуални заслуги и дека секоја друга одлука поразлична од одлука за започнување на преговори ќе има негативно влијание врз внатрешните политички процеси како што се спроведувањето на реформите, имплементацијата на Договорот од Преспа, како и тоа дека ќе се повлечат прашања кај граѓаните за кредибилноста и принципот на доследност на Европската Унија, а ќе се отворат и ултра националистички реторики кои ја потпалуваа нашата земја во минатото, а се сѐ уште присутни на Балканот. 

„Затоа единствениот заклучок е дека отворањето на преговори за наше членство во ЕУ е единствената гаранција да ја задржиме домашната стабилност, инклузивниот процес на носење политики и да го задржиме реформскиот процес во Северна Македонија. И тоа секако ќе има позитивно влијание за целиот Западен Балкан“,  го заврши своето обраќање премиерот Заев во рамки на јавната дебата и предавање организирано од престижниот институт ИФИМЕС.