Претседателот на Владата на Република Северна Македонија Зоран Заев и државниот секретар на Соединетите Американски Држави Мајкл Помпео на заедничка прес-конференција ги презентираа своите изјави за средбите и разговорите за време на еднодневната официјална посета на првиот човек на американскиот Стејт Департмент на нашата земја.
Премиерот Заев истакна дека посетата на државниот секретар на Соединетите Американски Држави Помпео е силен сигнал за континуираната поддршка на САД за нашата земја, за нашите евро-атлантски интеграции и убава прилика уште еднаш да потврдиме дека продолжуваме да работиме заедно на понатамошно продлабочување на нашите односи и соработка.
„САД се докажан пријател и поддржувач на Северна Македонија. Покрај силната политичка поддршка од независноста до денес, имаме добиено силна поддршка и преку различни проекти и програми на УСАИД за развој на демократијата, институциите и за подобрување на животот на нашите граѓани. Голем број волонтери на Мировниот корпус дадоа и даваат важен придонес во развојот на локалните заедници низ целата држава. Американскиот народ е пријател на македонскиот народ, и на сите народи коишто живеат во нашата земја“, нагласи премиерот Заев.
Тој додаде дека Северна Македонија, како посветен стратешки партнер на САД дели заеднички заложби и вредности за безбедност, слобода и демократски просперитет во регионот, како и заедничките активности во борбата против тероризмот и против другите закани за мирот ширум светот, вклучувајќи и иницијативи кои се конфронтираат на дезинформациите и на заканите по демократијата.
„Со нашето полноправно членство во НАТО, нашиот придонес во таа насока ќе добие силен поттик и нова димензија. Членството во НАТО е наша суверена одлука, за која има силна натпартиска поддршка и меѓуетнички консензус. Тоа е за нас постигнување на една историска цел. Голема придобивка не само за нашата земја, туку и за зајакнување на безбедноста, слободата и демократскиот просперитет во целиот регион“, потенцираше претседателот на Владата на Северна Македонија Заев.
Премиерот Заев информираше дека за време на средбата го запознал државниот секретар Помпео за нашите остварувања за ослободување на заробената држава и за реформите со кои се поставија нови темели за зајакнување на демократските вредности, институциите и правната држава.
„Слободата на медиумите е значително подобрена, и развиваме инклузивен процес на носење одлуки. Градиме едно општество за сите, мозаик од различности во кој нашиот фокус е ставен на економијата која овозможува шанса за подобар живот на сите граѓани.
Северна Македонија е уникатна земја во регионот затоа што нема отворени билатерални прашања со ниту еден сосед. Договорите со Бугарија и Грција беа историски одлуки и пресудни чекори за остварување на нашите стратешки цели - членството во НАТО и ЕУ, што ни дава за право за десетина дена да ја очекуваме долгоочекуваната вест од Брисел - отворање на преговори за членство во ЕУ“, изјави пред новинарите премиерот Заев и додаде дека добрата вест од Брисел ќе влијае позитивно на целиот регион и ќе ги охрабри другите земји да покажат политичка храброст за надминување на останатите проблеми.
Државниот секретар на САД Мајкл Помпео во својата изјава за медиумските претставници нагласи дека растот на тимот во американската амбасада го симболизира и растот на односите меѓу двете земји кои оваа година одбележуваат 25 години. Република Северна Македонија е сојузник на американските војници во мисиите во Ирак и Авганистан и тоа е сериозен придонес за светскиот мир.
„Ги поздравувам договорите за пријателство и соработка на вашата земја со соседите Грција и Бугарија со кои стана реалност членството во НАТО и ЕУ. САД, како водечка демократија во светот, ги почитува и поддржува сите земји кои ги унапредуваат демократските процеси, владеењето на правото и борбата против корупцијата. Северна Македонија, како независна и слободна земја ги почитува различностите и САД ќе продолжи да ве поддржува за доброто на вашите граѓани, за регионот и за светот“, истакна во својата изјава за медиумите државниот секретар на САД Мајкл Помпео, со што се заокружи официјалниот дел од програмата на неговата посета на Северна Македонија.
Во продолжение ви ја пренесувате изјавата на премиерот Заев за медиумите по повод средбата со Државниот секретар на САД, Мајкл Р. Помпео.
Почитуван Државен секретар на Соединетите Американски Држави,
Господин Мајкл Помпео,
Почитувани претставници на медиумите,
Почестени сме што денес Северна Македонија е домаќин на Државниот секретар на Соединетите Американски Држави, господинот Мајкл Помпео.
Оваа посета е силен сигнал за континуираната поддршка на САД за нашата земја, за нашите евро-атлантски интеграции и убава прилика уште еднаш да потврдиме дека продолжуваме да работиме заедно на понатамошно продлабочување на нашите односи и соработка.
САД се докажан пријател и поддржувач на Северна Македонија. Покрај силната политичка поддршка од независноста до денес, имаме добиено силна поддршка и преку различни проекти и програми на УСАИД за развој на демократијата, институциите и за подобрување на животот на нашите граѓани. Голем број волонтери на Мировниот корпус дадоа и даваат важен придонес во развојот на локалните заедници низ целата држава. Американскиот народ е пријател на македонскиот народ, и на сите народи коишто живеат во нашата земја.
Северна Македонија е посветен стратешки партнер на САД. Имаме силни политички и историски причини да го одржуваме и зајакнуваме нашето пријателство. Дел од нив се нашите заеднички заложби и вредности за безбедност, слобода и демократски просперитет во регионот, како и заедничките активности во борбата против тероризмот и против другите закани за мирот ширум светот. На господинот Помпео му предочив дека сме подготвени со уште посилно темпо да учествуваме во сите глобални иницијативи кои се конфронтираат на дезинформациите и на заканите по демократијата.
Со нашето полноправно членство во НАТО, нашиот придонес во таа насока ќе добие силен поттик и нова димензија. Членството во НАТО е наша суверена одлука, за која има силна натпартиска поддршка и меѓуетнички консензус. Тоа е за нас постигнување на една историска цел. Голема придобивка не само за нашата земја, туку и за зајакнување на безбедноста, слободата и демократскиот просперитет во целиот регион.
Досега Пристапниот протокол за членство на Северна Македонија во НАТО го ратификуваа 22 земји и ние со оптимизам очекуваме полноправно членство во НАТО во блиска иднина. Сакам да се заблагодарам на САД за недвосмислената, двопартиска поддршка за нашето членство во НАТО. За брзо ја очекуваме добрата вест дека протоколот ќе се ратификува и во САД.
Во меѓувреме целосно сме подготвени да ги прифатиме обврските за членство во НАТО. Имаме силна политичка волја буџетот за армијата да биде најмалку 2% од БДП и тоа не подоцна од 2024 година. Тие средства ќе се употребат за модернизација на нашата армија и за зајакнување на нашите капацитети и можности да придонесуваме во НАТО.
За време на нашата средба имав прилика да го информирам господиниот Помпео за нашите остварувања со кои ја ослободивме заробената држава. Поставивме нови темели и ги зајакнавме демократските вредности, институциите и правната држава. Слободата на медиумите е значително подобрена, и развиваме инклузивен процес на носење одлуки. Градиме едно општество за сите, мозаик од различности во кој нашиот фокус е ставен на економијата која овозможува шанса за подобар живот на сите граѓани.
Северна Македонија е уникатна земја во регионот затоа што нема отворени билатерални прашања со ниту еден сосед. Договорите со Бугарија и Грција беа историски одлуки и пресудни чекори за остварување на нашите стратешки цели – членството во НАТО и ЕУ.
За десетина дена ја очекуваме долгоочекуваната вест од Брисел – отворање на преговори за членство во ЕУ.
Верувам дека добрата вест од Брисел ќе влијае позитивно на целиот регион. Ќе биде испратена порака дека Западниот Балкан е интегрален дел од Европа. Ќе биде награден напредокот на реформите и решавањето на тешките проблеми. Тоа ќе ги охрабри другите земји да покажат политичка храброст за надминување на останатите проблеми. Добрите вести за почеток на преговорите со ЕУ и за членството во НАТО се силна порака и за младите од нашата земја: Северна Македонија се менува кон подобро - овде може да се живее добро, а развојот ќе биде побрз само ако младите се ангажирани, тука во својата земја.
За крај, сакам да нагласам дека стабилен балкански регион е од интерес за ЕУ: геополитички, безбедносно и економски. И во овој контекст, оваа посета и охрабрувањето од САД е од огромно значење за нас.
Ви благодарам.
