Денес е Меѓународниот ден на ненасилство, ден кој треба да нѐ потсети дека имаме обврска и должност да градиме култура на мир, трпеливост и меѓусебно разбирање.

Реакциите на јавноста по повод бруталноста на одделни припадници на полицијата, како и на некои граѓани против припадниците на безбедносните служби, се израз на зрелоста на нашето општество – очекувам дека ваквите појави ќе станат реткост до целосно исчезнување и дека секогаш ќе бидат осудувани и санкционирани.

Ние сме земја која обединува различни етнички, верски и други групи. Со векови сме го граделе она што денес го имаме и треба секој ден да се потсетуваме колку е тоа бесценето, но и кршливо и дека секое насилство и говор на омраза се закана за овие наши вредности.

Нашата приказна е мозаик со силни контрасти и потребно е постојано да останеме фокусирани на шаренилото и убавината на целиот мозаик, секое камче е вредно зашто е дел од таа убавина.

Ве повикувам сите, да се спротивставиме на насилството и да ја раскажуваме нашата убава македонска приказна по која стануваме познати во целиот свет, дека со зборови и дијалог секогаш се доаѓа до решение.