Во рамките на работната посета на Сојузна Република Германија, министерот за надворешни работи, Никола Попоски оствари средби со Кристох Хојсген, советник за надворешна и безбедносна политика на Сојузниот канцелар, Ангела Меркел, со пратеници од германскиот Бундестаг, претставници на Фондацијата Конрад Аденауер, а имаше и излагање во Фондацијата за наука и политика, на тема: „Република Македонија на патот кон НАТО и ЕУ“.

Централни теми на разговорите беа европските и евроатлантските интегративни процеси на нашата држава, спорот за името со Грција, како и регионалната соработка. Министерот, Попоски исцрпно елаборираше за сите прашања за кои соговорниците искажаа интерес.  Од германска страна беше искажана целосна поддршка на патот на РМ кон полноправно членство во ЕУ и НАТО.

Во поглед на прашањето за името министерот Попоски ја истакна  конструктивната позиција на РМ во процесот на преговорите за изнаоѓање на заемно прифатливо решение.