Министерката за одбрана, Радмила Шекеринска денеска ја посети компанијата „Везе Шари“ каде на средба со нејзиниот сопственик, Арбен Абдурахмани разговараа за начините како државата да продолжи да им помага на производителите кои со членството во НАТО треба да бидат поамбициозни, да го зголемат производството, а со тоа да отворат и нови работни места.

„Оваа домашна компанија покажува дека е возможно да се пробиете на НАТО пазарот дури и пред државата да стане членка на НАТО Алијансата. Заедно со сопственикот, нашиот реномиран бизнисмен од ‘Везе Шари’, зборувавме дека постојат начини како државата и понатаму може да им помага на ваквите производители со нашето членство во НАТО да бидат поамбициозни, навистина да отворат нови врати и да овозможат поголем износ и поголемо производство, а тоа значи и повеќе работни места дома кај нас. Тоа е целта на нашиот Центар за поддршка на домашните компании. Сакам уште еднаш да ги повикам домашните компании да се пријават, да ги искористат предностите кои што им ги даваме, а тоа е пред сè една брза и ефикасна процедура. Покажавме дека за само неколку дена можеме и официјално да им ги отвориме вратите на НАТО пазарот и со квалитетот на своите производи, со конкурентната цена да победуваат на овие тендери“, рече министерката.

Шекеринска порача дека Владата е целосно отворена кон агро-бизниснисот и дека ќе продолжи да помага на сите домашни производители да го рашират бизнисот и да отворат нови работни места. Таа честиташе за досегашниот успех на „Везе Шари“ и додаде дека искуството на оваа компанија треба да биде поттик за сите домашни компании да бидат уште поуспешни во своето работење.

„Ова денеска што го видов зборува за веќе две децении ангажман дома и искуство во странство. Во домашното производство и ние како Влада со поддршка можеме да инвестираме, а домашните производители дефинитивно можат да ни го покажат правецот и да ни дадат дополнителни идеи“, истакна министерката.

Директорот на „Везе Шари“, Абдурахмани го поздрави пристапот на Министерството кој овозможува нашите компании да може да извезуваат на НАТО пазарите и ги охрабри сите бизнисмени да се пријават и да бидат уверени дека домашните компании имаат капацитет да ја снабдуваат Алијансата.

„Го поздравувам пристапот на Министерството што овозможува на нашите компании да може да извезуваат на НАТО пазарите и ги охрабрувам сите бизнисмени дека не е толку тешко за да можеме да го снабдуваме НАТО. Ние како компанија уште во 2013 година имаме дозвола за снабдување во НАТО со нашите производи и овој чекор кој го презема Министерството е многу добар и се надевам дека што побрзо повеќе компании ќе ги гледаме на листа на НАТО пазарите“, изјави Абдурахмани.