Најновата инвестиција на „Џонсон мети“ во Бунарџик претставува силен сигнал за останатите странски инвеститори кои сакаме да ги привлечеме, оцени денеска премиерот Никола Груевски.

-  Инвестицијата на „Џонсон мети“ во Бунарџик претставува втора по ред инвестиција на една меѓународна компанија. Тоа е голем сигнал за останатите инвеститори затоа што кога еден таков глобален играч се одлучува по втор пат да инвестира по неколку години укажува дека е задоволен од досегашното работење во Македонија, изјави Груевски, одговарајќи на прашања по денешната промоција на нови наслови на книги од владиниот проект за превод на 1.000 стручни, научни книги и учебници од кои се учи на врвните универзитети.

Според премиерот, значајно е и тоа што со вкупно 140 милиони евра инвестирани во Македонија, по завршувањето на оваа инвестиција, „Џонсон мети“ ќе стане најголема гринфилд инвестиција со над 500 вработени и висока технологија.

- Значајно е што инвестираат во висока технологија и што многу наши кадри добиваат дополнителни обуки на таа висока технологија така што покрај „Џонсон контролс“ кој лани дополнително инвестираше во Македонија, ова е втор пат да имаме втора инвестиција во Република Македонија од една меѓународна компанија, нагласи Груевски.