Во Прилеп денеска беше пуштен во употреба новиот Царински терминал. На отворањето на терминалот кој треба ќе обезбеди поефикасно царинење на стоките на фирмите од овој дел на Пелагонија присуствуваа вицепремиерот и министер за финансии Зоран Ставревски и директорот на Царината Ванчо Каргов.

Според Ставревски, изградбата на новиот царински терминал во Пприлеп е во насока на развој на економијата во овој регион и чекор во  продолжување на соработката меѓу локалната и централната власт.

- Нема отворање нови работни места без успешно стопанство и стопанственици и добри услови за фирмите. Токму во насока на поуспешно стопанство е пуштањето во употреба на овој царински терминал со цел да им  ги подобриме условите на фирмите во Прилеп за полесно, со помалку трошоци, време и напор да може да ги царинат стоките наменети за извоз, изјави Ставревски на пуштањето на терминалот.

Тој нагласи дека соработката меѓу Владата и локалната власт се клучни за развој на економијата, а, како што рече, со општина Прилеп односите се добри  во континуитет.

Вицепремиерот Ставрески е уверен дека и фирмите од Крушево, Македонски Брод и пошироко ќе го користат овој царински терминал.

Со магацинскиот простор со кој располага прилепскиот царински терминал, се создадени условите за царинење на стоките и нивна контрола во спречувањето на обиди за шверц, смета директорот на македонската царина Ванчо Каргов.

- Ова е  завршница од подолготрајна изградба на терминалот. Со изградбата на магацинот се исполнија условите за работа на царинскиот терминал. Сега, ќе се забрзаат извозот и увозот кој ќе го прават не само фирмите од прилепско, туку и од околните општини. Истовремено, со овој магацин ќе се овозможи подобра контрола на увозот и извозот на стоки со што ќе се помогне да се спречи евентуален шверц или губење на буџетски приходи, рече Каргов.

Отворањето на царинскиот терминал е со задоцнување од два месеца но тоа, сметаат од надлежното јавно претпријатие „Комуналец“ е поради зимските несоодветни услови за работа. Терминалот располага со паркинг простор од 5.000 метри квадратни, нова хала и  автоматоматизирани административни услуги. Изградбата чинеше вкупно 24 милиони денари, дел средства од општината, а најголемиот дел од ЈП „Комуналец“.

Во терминалот од денеска ќе може да се царинат и половните моторни возила што не беше случај досега.

Потпретседателот на Владата и министер за финансии Зоран Ставревски присуствуваше и на седницата на економскиот совет на Прилеп. Беа претставени купувачите на 16 од 21-та парцела со колку што располага новата индустриска зона во „Прилеп“. Парцелите се продадоа на две електронски аукции минатиот месец. Купувачите се прилепски фирми кои ги прошируваат капацитетите и кои во иднина ќе обезбедат преку 1.600 работни места. Меѓу купувачите се текстилните фирми „Кули“, „Мартекс“, прехранбените „Марфил“, „Дониа“, кои купија по две до четири парцели, потоа печатарската фирма “Гинис”  и повеќе прилепски сервисни фирми.