Владиниот економски тим предводен од премиерот Никола Груевски во кој се заменик претседателот на Владата задолжен за економски прашања Владимир Пешевски, министерот задолжен за привлекување странски инвестиции, Веле Самак, како и директорот на Агенцијата за странски инвестиции и промоција на извозот, Висар Фида, попладнево ги претстави економските и инвестициските потенцијали пред шеесетина претставници на италијански компании на бизнис форум во Рим.

Премиерот Груевски изрази особена чест и задоволство да биде меѓу претставниците на италијанската индустрија и трговија, токму во Рим, градот со неколкумилениумска историја. - Уште во вториот век пред Христовото раѓање, Рим бил поврзан со римските провинции на јужниот Балкан, меѓу кои и Македонија, преку познатиот коридор „Виа Егнација“. Ако тогашните далечини биле совладливи за интензивна трговија меѓу нашите предци, тогаш не смееме да го игнорираме генерацискиот предизвик да ги зајакнеме политичките, економските и културните врски меѓу нашите нации, истакна премиерот Груевски на воведот од своето обраќање.

Познавајќи ги економските потенцијали на нашите земји, убеден сум дека постојат уште многу неискористени можности за трговска, и особено инвестициска соработка и токму овој форум е вистинскиот чекор во таа насока, подвлече Груевски.

Премиерот истакна дека и покрај анемичниот економски растеж на европскиот континент во последниве две години Македонија им посака добредојде на инвестициите на американските корпорации „Џонсон Контролс“ и „Кемет електроникс“, германските компании „Кромберт и Шуберт“ и „Дрекселмејер“, швајцарскиот „Виндтек Интернешенел“ и повеќе други.

Република Македонија го привлече вниманието на светската инвеститорска заедница со нејзиниот брз и сигурен поход кон првите три позиции на најреформски ориентирани земји, според угледниот „Doing Business“ извештај на Светската банка за 2012 година. Македонија сега се наоѓа на 22-та позиција во светски рамки, меѓу 183 земји, и е највисоко рангирана во однос на било која транзициона економија од Југоисточна Европа, истакна премиерот.

Овие успеси не се случајни, туку плод на длабоките и суштински реформи кои ги спроведе Владата на Република Македонија во изминатите шест години, потенцираше премиерот Груевски и ги покани италијанските инвеститори да дојдат во посета и директно да ги согледаат потенцијалите кои ги нуди македонската економија.

Своја презентација на форумот имаше и вицепремиерот Владимир Пешевски кој подетално ги запозна бизнисмените со макроекономските постигнувања на Македонија, потоа со атрактивниот даночен систем, брзите процедури за водење бизнис, како и со неколку области каде што постојат силни потенцијали за влез на странски инвестиции.

На форумот свои презентации имаа и министерот Самак и директорот на Инвест Македонија Висар Фида.

Со овој бизнис форум во Рим се заокружува економскиот дел од дводневната посетата на владиниот тим на Торино, Милано и Рим. За време на овие два дена премиерот Груевски и членовите на владиниот економски тим ги претставија инвестициските потенцијали на Република Македонија пред повеќе италијански бизнисмени на вкупно пет настани, односно на три бизнис форуми и на две работни средби што се одржаа во Торино, Милано и Рим.