Националниот конзерваторски центар ќе биде опремен со два нови апарата кои наскоро ќе бидат ставени во функција. Обезбедени се од Владата на РМ и ќе се користат во лабораторијата за физичко-хемиски испитувања на културното наследство.

НКЦ денеска го посети министерката за култура Елизабета Канческа-Милевска и со директорот на оваа национална установа Мемет Селмани констатираа дека плановите се реализираат според динамиката.

За оваа година преку Министерството за култура се обезбедени средства за над 40 проекти за конзервација и реставрација на верски објекти, санација на фасади и активности на локалитети.

- НУ Национален конзерваторски центар е значајна институција бидејќи е матична за заштита на културното наследство на целата територија на Република Македонија. Можеби многу работи што таа ги реализира не се видливи, но се многу значајни за заштитата на културното наследство. Министерството за култура континуирано финансиски ги поддржува проектите на Центарот, кои се однесуваат на непосредна превенција, заштита, презентација, валоризација и ревалоризација на недвижното културно наследство..., рече Канческа-Милевска.

Покрај од буџетот од државата, некои проекти се реализираат и со странски грантови. До октомври треба да заврши реставрацијата на фасадата на Шарена џамија во Тетово со средства од Амбасадата на САД, а со грант од Советот на Европа е почнат проектот за комплексот Старо Нагоричане.

НКЦ има специјализирани ателјеа  за конзеврација на фрески, мозаици, икони и дрвена пластика. Директорот Селмани рече дека имаат малку стручен кадар зашто постојниот заминува во пензија и очекува да биде обновен.

- Ќе се потрудиме со поддршка на Владата да се обезбедат лица за вакви специфични струки за ателјеата да функционираат без застој. И како Министерство за култура ќе се потрудиме да се дадат вработувања за да не згаснат овие дејности, рече Канческа-Милевска.