Министерот за здравство Никола Тодоров денеска ја посети поликлиниката во Ѓорче Петров каде што го пушти во употреба четвртиот мамограф инсталиран во Скопје, по поликлиниките во Чаир, Јане Сандански и Букурешт.

- Оваа дијагностичка процедура е една од процедурите кои што имаат подолго време на чекање, не само во Македонија, туку во цела Европа и пошироко. Она со што може да се пофалиме е дека времето на чекање во земјата, а особено во Скопје по инсталирањето на четвртиот мамограф ќе биде едно од најкратките во регионот, изјави Тодоров по пуштањето во упореба на апаратот.

Кај нас, нагласи, времето на чекање е еден до два месеци најмногу и тоа за оние прегледи каде нема сомнение за малигна болест. Таму каде што има такво сомневање, рече Тодоров, тогаш прегледот се презема најмногу во рок од еден ден.

- Тоа е навистина многу брза дијагностика која помага за побрзо дијагностицирање и третман на ова тешко и најмасовно заболување кај жените, а тоа е ракот на дојка. Очекувам дека со инсталирањето на овој мамограф, бенефит ќе имаат до 50.000 жени кои гравитираат на ова подрачје, а се потенцијални корисници на апаратот, нагласи Тодоров.

Министерот информираше дека тендерот за набавка на дополнителни 55 клима уреди за поликлиниката е во завршна фаза, а во текот на наредните денови треба да заврши електронската аукција, по што ќе биде избран најдобар понудувач и склучен договор.