Министерот за одбрана Фатмир Бесими денеска ги посети припадниците на Ренџерскиот баталјон на АРМ кои на планината Бистра  ја изведуваат обуката „Базирање и исхрана во природа“.

Целта е да се оспособат за преживување при подолг престој во природа. Припадниците од Ренџерскиот баталјон учат како да препознаваат, собираат и приготвуваат продукти од природата, но и како да продолжат со борбени дејства и во услови кога нема храна и вода.

 - Ова е една од најспецифичните обуки во оваа елитна единица на Армијата на Република Македонија, каде што нашите војници се соочуваат со природата за да преживеат, што е исклучително битно за подготвеноста на нашата армија согласно со највисоките стандарди на меѓународните институции, пред се НАТО. Оваа единица во однос на подготвеноста во досегашниот период ги има добиено највисоките оценки од Алијансата, истакна министерот Бесими откако го разгледа кампот.

Тој посочи дека ренџерите и другите нивни колеги од АРМ даваат пример и ги повика младите независно од нивната етничка и верска припадност да се приклучат и да ја изберат армијата за професија и, како што рече, благородна кариера зашто ќе придонесуваат за мирот и стабилноста на својата татковина, но и во глобални рамки.

Ренџерите се задоволни од обуката. Велат дека одлично се снаоѓаат во природа, на час и половина од првото населено место и во опкруженост со диви животни.

Овој тип обуки се изведуваат најмалку еднаш во годината. Опфаќаат подготовка и формирање логорска просторија, употреба на логорска опрема и изработка на импровизирани печки и огништа, техники на снабдување со вода, препознавање и собирање печурки и диви билки за јадење, техники за фаќање диви животни, риби и птици, и за нивно приготвување. Покрај тоа, тие се обучуваат и како да дадат прва помош и да транспортираат  во случај на труење од билки, каснување од змија, од разни инсекти или од диво животно, како и од топлотен удар, сончаница, изгореници или смрзнатини во зимски услови.