Министерот за економија Ваљон Сарачини денеска ја посети Матка каде се сретна со претставниците од Спелеонуркачкиот клуб „Врело“ и членовите на меѓународната експедицијата.

Нуркачи од Италија, Белгија и Македонија повторно ќе нуркаат во подводната пештера Врело за да се постигне нов рекорд и пештерата да стане најдлабока во светот.

- Се трудиме да направиме што поголема промоција на туристичките атракции во нашата земја и разгледуваме опции како да направиме и едно претставување на видео проекции од видео снимките од подводната пештера. Планираме за оваа активност да поставиме и туристички инфо центар во овој регион, изјави Сарачини по средбата со нуркачите.

Според нуркачите кои се надеваат дека ќе ја истражат пештерата уште подлабоко, Врело најверојатно е една од најдлабоките пештери во светот. Истакнуваат оти местото има капацитет да биде уште истражувано, а кога ќе завршат истражувањата, веруваат дека пештерата ќе може да се пушти во комерцијална употреба.

Со досегашната постигната длабочина, Врело е на петтото место на листата најдлабоки истражени подводни пештери. Истражувањата на пештерата се поддржани од Министерството за економија, Град Скопје и МВР.