Во Владата на Република Македонија, денеска (среда, 12 септември 2012 година) се одржа редовна седница на Комитетот за туризам со која претседаваше претседателот на Владата, г-дин Никола Груевски.                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                                               Посебен акцент на седницата се стави на информацијата за напредокот во реализација на Проектот – Мега атрактивен ски центар Попова Шапка. Во однос на овој проект за модернизација и развој на скијачкиот центар Попова Шапка, АД ЕЛЕМ потпиша Договор за изработка на Мастер План Студија со консултантската компанија Ecosign Europa Mountain Recreation Planners GmbH, од Австрија. Целта на овој Мастер План кој треба да биде комплетно готов за еден месец е да подготви техничка проценка на природните ресурси на теренот предвиден за модернизација, односно изградба на Мега атрактивниот ски центар Попова Шапка.

Дополнително, на Комитетот за туризам се дискутираше и за создавање на Национална асоцијација на македонски винарии, потоа за можноста за посета на ловните капацитети во Република Македонија од страна на туроператори од Италија кои би помогнале во развој и  промоција на ловниот туризам во државата, како и за отпочнување на постапката за градење на нови сместувачки капацитети со „планинска конотација“, односно мали хотели и апартмани на локации како Пониква, Берово, Крушево, Галичица, Голак, Пехчево, Вевчани, Лазарополе, Смоларски водопади, Галичник, Тресонче, Радовиш и Гари.

Воедно, Комитетот за туризам расправаше и за Стратегијата за медицински туризам, потоа за развојот на новите форми на туризам во националните паркови, како и за проектот за изградба на планинарски  велосипедски патеки во Република Македонија, за што се донесоа заклучоци за отпочнување со нивна реализација.