Министерот за надворешни работи на Република Македонија, Никола Попоски, присуствуваше на отворањето на Генералната дебата на 67^то заседание на Генералното собрание на Обединетите нации. Исто така,  учествуваше и на министерскиот состанок на тема: “Водата, мирот и безбедноста“, што заеднички го организираа Обединетите нации, Европската Унија и САД.

Во текот на денот учествуваше и на Трансатлантската работна вечера, на покана на Државниот секретар на САД Хилари Клинтон со своите колеги од земјите-членки на ЕУ и НАТО.  Во своето обраќање, министерот Попоски се осврна на придонесот кој Република Македонија го дава со присуството во НАТО-Мисиите како рамноправен партнер на земјите-членки на Алијансата. Притоа, нагласи дека очекува заслуженото членство на Република Македонија во НАТО наскоро да стане реалност.

На маргините на 67-то Генерално собрание на Обединетите нации, министерот Попоски оствари и повеќе билатерални средби, меѓу кои средба со МНР на Сингапур, К Шамугам и средба со претставници на Американско-Еврејскиот Комитет.

На средбата со колегата од Сингапур беа разгледани можностите за унапредување на економската соработка во доменот на трговската размена и привлекувањето на директни инвестиции во Република Македонија, особено по искажаниот интерес на сингапурските компании за време на одржувањето на владиното „Road show“ минатата година. Министрите разговараа и за поттикнување на размена на студенти во областа на образованието како и за  создавање опции за соработка на дипломатските служби  што ќе придонесе за поголемо зближување на двете земји.