Наскоро ќе почне реконструкција на опожарениот блок во студентскиот дом „Гоце Делчев“, а се очекува и тендер за идејно решение за градење студентски дом на местото на бараките наречени „Медицинар“.

Ова го најави денеска премиерот Никола Груевски по промоцијата на 25 нови стручни наслови на книги од различни научни области кои се дел од проектот „Превод на 1000 стручни, научни книги и учебници од кои се учи на врвните, најдобрите и најреномираните универзитети во САД и Англија, а од областа на правото во Франција и Германија“.

Реконструкцијата на опожарениот блок во студентскиот дом „Гоце Делчев“, според Груевски, била планирана пред пожарот.

- Реконструкцијата на тој блок ќе почне наскоро и во текот на летото ќе заврши. Од септември студентите ќе може да се вселат во реконструиран блок, токму онаму каде што беше опожарувањето на една или неколку простории, изјави Груевски одговарајќи на новинарско прашање.

Овој или следниот месец, премиерот информира дека ќе има објава на тендер за идејно решение за градење нов студенти дом во „Медицинар“ и откако ќе се направи идејното и проектот ќе има и тендер за градба.

- Се надевам дека до крајот на годината ќе завршат овие процедури со проектирање и околу крајот на годината или почетокот на следната ќе почне со градба нов објект на местото од постојните бараки. Тие ќе одат во историјата и на нивно место ќе се гради тврда градба, рече Груевски.

Во однос на проектот за изградба и реконструкција на училиштата, тој посочи дека предвидена е реконструкција на околу 40, градба на 12 модуларни и изградба на 12 нови училишта.

- Само за оваа година 11 милиони евра се насочени токму за реконструкција и градба на нови училишта. Тоа е дел од Програмата на Владата, дел од ветувањата и тоа ќе биде реализирано, нагласи Груевски.