Во рамки на работната посета на Кочани денеска вицепремиерот задолжен за економски прашања Владимир Пешевски се сретна со вработените во Подрачната единица за земјоделство, шумарство и водостопанство и во Агенцијата за поддршка на земјоделството, како и со градоначалникот Ратко Димитровски.

На средбата стана збор за проблемите со кои се среќаваат овие владини сектори, како и за владините политики во областа на земјоделството.

Притоа, вицепремиерот Пешевски најави дека во најскоро време ќе се реши проблемот со просторот за Подрачната единица на Министерството за земјоделство.

- Ќе ги преуредиме просториите и ќе создадеме услови земјоделците при аплицирањето за субвенции да доаѓаат во подобри услови, изјави Пешевски.

Тој зборуваше и за проектот што Министерството го реализира со турската компанија ТИКА за новите сорти на ориз и нивното пробно производство на полињата во Кочанско, за увозот и употребата на препарати во оризопроизводството со сомнителен квалитет, како и за откупот на оризот од годинашната реколта.

Напомена дека определба на Владата е да го стимулира бизнис секторот и земјоделството со пронаоѓање на компании кои ќе инвестираат и во тој контекст најави дека компанија од автомобилската индустрија ќе инвестира во Кочани.