Македонија има искрен пријател во Хрватска која отворено и искрено ја поддржува на нејзиниот пат кон евроинтегративните процеси, му порача хрватскиот претседател Иво Јосиповиќ на македонскиот премиер Никола Груевски.

На денешната средба во Загреб, хрватскиот претседател истакна дека во Република Македонија гледа искрен пријател за што говори и интензивирањето на билатералните средби, односно две посети за помалку од две недели.

Премиерот Груевски изрази задоволство од отворената искрена поддршка на Хрватска за интегративните процеси на Македонија кон евроатлантските организации.

Тој го запозна хрватскиот претседател со прогресот и реформите што државата ги прави на планот на исполнувањето на критериумите за влез во ЕУ и НАТО. Притоа, Груевски нагласи дека високите критериуми за влез во НАТО се исполнети уште во 2008 година.

На средбата премиерот Груевски констатира дека нема отворени прашања меѓу двете држави и оти меѓусебните односи се карактеризираат со пријателство и солидна билатерална соработка.

Тој изрази надеж дека добрите и пријателски односи на политички план ќе се пресликаат и на економски план со дополнителни интензивирања на соработката.

Хрватскиот претседател истакна дека постојат повеќе заеднички проекти за кои се заинтересирани хрватски компании кои се надева дека ќе се реализираат во наредниот период и ќе допринесат за поголема економска соработка меѓу двете држави.

Премиерот Груевски ја нагласи и можноста за културна соработка и за соработка на полето на образованието преку студиски програми за размена на студенти.