Студентите по информатика и од други технички факултети имаат можност да се запознаат со понудите за вработување или за пракса во компании од техничките сектори, кои се претставуваат на 10. Саем за вработување и кариера (Job Fair 2014).

Саемот утре и задутре ќе се одржува на ФИНКИ, ФЕИТ, Машинскиот и Технолошко-металуршкиот факултет, а во четврток и петок на Градежниот факултет, каде што свои презентации ќе имаат соодветни компании.

Организатори се студентската организација „Бест Скопје“ и Студентскиот парламент на ФИНКИ. Тие се задоволни од одѕивот на 18 компании на саемот, на кој годинава првпат учествуваат и странски. Ги охрабрија студентите да ги достават своите биографии на www.jobfair.org.mk кои организаторите ќе им ги достават на фирмите. 

Саемот за отворен го прогласи министерот за образование и наука Спиро Ристовски, кој истакна дека едуцираниот стручен технички кадар е потреба на новото време и е се повеќе баран на пазарот на трудот. Техничките науки, рече тој,  се и приоритрт на Владата и за овој вид студии е поголем бројот на стипендии во однос на другите науки. Според Ристовски, тоа го препознаваат и студентите, зашто се зголемува нивниот интерес за техничките науки - во 2010/2011 во таа област биле запишани 20 отсто од вкупниот број студенти, а за две години речиси 8 проценти повеќе.

- Иднината на работните места се повеќе е во техничките струки. Затоа апелирам до средношколците кои треба да одлучат каде да студираат да ги изберат информатичките науки како најбрзорастечки или на останатите технички факултети. Дипломираните од овие факултети најмалку чекаат за своето прво вработување, изјави министерот Ристовски.

Ги наведе и поволностите што треба да ги поттикнат во тој избор - различните стипендии  што ги дава Владата на РМ: 125 стипендии за информатичари со просечна оценка над 9; 650 стипендии за сите студенти на техничките факултети; и целосни стипендии за тие што ќе се запишат на некој од првите 200 технички факултети рангирани на Шангајската листа, односно двојно повеќе отколку за другите видови науки за кои стипендирањето важи ако се меѓу првите 100 на листата.

Саемот во изминатите години им помогнал на голем број студенти од овие факултети да најдат работа соодветна на нивното образование.

 - Компаниите на саемот нудат различни можности, некои нудат вработување, некои пракса, зависно од нивните потреби. Во минатите девет години има прилично многу вработувања, како и пракси кои сега се задолжителни во високото образование, изјави Весна Марковска од „Бест Скопје“.

Деканот на Факултетот за информатички науки и компјутерско инженерство (ФИНКИ) Димитар Трајанов е задоволен што организирањето на саемот и поканата до фирмите е на иницијатива и со труд вложен од самите студенти.

- Тоа покажува дека тие и сега, додека се на студии, можат да сработат реални проекти. Со тоа ќе добијат искуство што значи да се организира голем настан, а директно контактирајќи со компаниите ќе го добијат чувството што значи да се контактира компанија, кои се нејзините барања, како се прават интервјуа итн. Ова е од самите студенти за самите нив, рече Трајанов, според кого голем број од студентите на нивниот факултет нашле работа и пред дипломирањето.