Националното координативно тело за инплементација на Конвенцијaта на ООН за правата на лицата со попреченост одржа конститутивна седница, со која претседаваше советникот на Претседателот на Владата за унапредување на образование, здравство, социјална заштита и спроведување на Конвенцијата на ОН за правата на лицата со попреченост во РС Македонија и воедно координатор на телото, м-р Снежана Трпевска.

На седницата која е прва по назначувањето на новиот состав, Трпевска информираше за улогата на Националното координативно тело, во кое се вклучени претставници од Канцеларијата на претседателот на Владата, четиринаесет министерства, две организации на лица со попреченост и една високообразовна научна институција, притоа истакнувајќи ја клучна улога во координирањето на сите активности и напори, кои ќе се вложат во исполнувањето на обврските што произлегуваат од Конвенцијата.

Покрај правните и институционалните реформи, телото ќе работи и на подигнување на свеста кај сите граѓани за правата на лицата со попреченост, како и за важноста на нивното активно вклучување во сите аспекти на општествениот живот.  

На седницата беше ставен акцент и на задачите на Националното координативно тело во изградба на партнерства, создавање позитивна и инклузивна атмосфера и обезбедување ефективно функционирање на сите процеси кои ќе доведат до подобрување на животниот стандард на лицата со попреченост. 

Националното координативно тело ги дефинира приоритетите и идните активности на делување.