На регионалната конференција „Глобалниот интегритет под опсада: Иновација против нелегалната моќ“, организирана од SELDI и МЦМС, заменик-претседателот на Владата на Северна Македонија задолжен за политики на добро владеење, Арбен Фетаи, ја реафирмираше посветеноста на Владата за борба против корупцијата и зајакнување на демократските институции.

Заменик претседателот на Владата Фетаи нагласи дека корупцијата претставува сериозна закана за демократскиот развој и институционалната стабилност, наведувајќи дека само 18 проценти од планираните антикорупциски мерки се спроведени во изминатата година. Тој повика на заедничка одговорност и нови напори, и покрај намалената меѓународна поддршка од USAID и IRI.

Фетаи го најави обновувањето на структуриран дијалог помеѓу Владата и граѓанското општество преку формирање на Совет за соработка помеѓу Владата и граѓанското општество, како и вклучување на претставник од граѓанското општество со право на глас во Меѓусекторското тело за координација на борбата против корупцијата.

„Демократијата бара силно и ангажирано граѓанско општество,“ изјави Фетаи, повторно истакнувајќи ја непоколебливата посветеност на Владата кон европската интеграција и владеењето на правото.

„Без независно судство, обвинители со интегритет и непристрасни судии, не може да има ниту ефективна борба против корупцијата, ниту успешна интеграција во ЕУ. Транспарентноста и правдата не се луксуз – тие се морален и политички избор“, заклучи Фетаи.