Заменик престедателот на Владата на Република Северна Македонија задолжен за политики на добро владеење, Арбен Фетаи, оствари средба со г. Аидан Ејакуза, Извршен директор на Партнерството за отворено власт (ПОВ), на која присуствуваа и г-ѓа Сандра Парнар, регионална координаторка на ПОВ, и г-ѓа Гордана Гапиќ Димитровска, национална координаторка на ПОВ. Средбата се фокусираше на приоритетите на иницијативата „Отворена Северна Македонија“, со посебен акцент на борбата против корупцијата, дигиталната трансформација, соработката со граѓанското општество и судските реформи, кои ќе бидат вклучени во Акцискиот план на ПОВ за 2026 година.

Во основата на разговорот беа реформите поврзани со членството во Европската Унија, особено транспарентноста на крајната сопственост и отвореното правосудство, како клучни обврски за исполнување на стандардите од Поглавјата 23 и 24 на ЕУ. Исто така, беше нагласена улогата на Северна Македонија како регионален пионер во отвореното владеење, како и можноста за организирање на Регионалната средба на Западен Балкан 2026 во Скопје.

Посебен акцент беше ставен на дијалогот со граѓанското општество, што е приоритет на кабинетот на вицепремиерот. Кабинетот ја обнови соработката преку три сесии на Советот за соработка со граѓанското општество, каде во јуни беше усвоена предложената владина стратегија. Во јули 2025, Владата ја усвои Стратегијата за соработка и развој на граѓанското општество (2025–2028). За да се обезбеди континуитет, ќе се организираат редовни месечни средби со Платформата на НВО против корупција и ќе се создаде механизам за јавни консултации, за да се промовира транспарентност и одржлива соработка.

Оваа средба претставува важен чекор кон зајакнување на отвореното и одговорно владеење, одразувајќи го ангажманот на Владата за градење на потранспарентна и праведна иднина за сите граѓани на Северна Македонија.