Заменик-претседателот на Владата на Северна Македонија задолжен за политики за добро управување, Арбен Фетаи, денес учествуваше на Регионалниот дијалог за политики за добро управување и лидерство на жените во Југоисточна Европа, организиран во Сараево од Регионалната иницијатива против корупцијата.
Обраќајќи им се на регионалните лидери и истакнатите панелисти, Фетаи ја подвлече клучната улога на жените во управувањето, нагласувајќи дека нивното лидерство ја зајакнува транспарентноста, отчетноста и инклузивното одлучување.
„Лидерството на жените не се сведува само на застапеноста, туку и на инклузивноста, етичкото управување и способноста за соочување со предизвиците. Мажите на раководни позиции не треба да бидат само пасивни поддржувачи, туку активни сојузници во надминувањето на стереотипите, создавањето можности и поттикнувањето системски промени,“ изјави Фетаи во своето обраќање.
Тој додаде дека родовата еднаквост не е само формално прашање, туку движечка сила за подобро управување.
„Интегрирајќи ја родовата еднаквост во јавните политики, обезбедувајќи отчетност и градејќи култура на инклузивно лидерство, можеме да создадеме институции кои ќе им служат на сите граѓани,“ нагласи Фетаи.